নিয়মীয়া বাৰ্তা, ৩০ মাৰ্চ : ৰাজ্যত অব্যাহত আছে নকল সোণৰ ব্যৱসায়। ৰঙিয়া আৰক্ষীৰ জালত পৰে ৫ নকল সোণ আৰু জালনোট সৰবৰাহকাৰী। বিশেষ সূত্ৰৰ খবৰৰ ভিত্তিত ৰঙিয়া থানাৰ এটা আৰক্ষীৰ দলে নিশা ৰঙিয়া ষ্টেচন ৰোডৰ সুভম হোটেলৰ পৰা ৫ সৰবৰাহকাৰীক আটক কৰে। অভিযানকাৰী দলটোৱে যুৱককেইজনৰ পৰা ৬টা মোবাইল ফোন, এখন নকল সোণৰ নাও, এটা সন্দেহজনক নকল টকাৰ বান্দিলৰ লগতে এখন ৰঙা ৰঙৰ মাৰুতি ছুইফট বাহন জব্দ কৰে । ছুইফট বাহনখনৰ নম্বৰ হৈছে AS-01 FK-9901 । আটকাধীন যুৱককেইজন হৈছে লখিমপুৰ জিলাৰ বিহপুৰীয়াৰ চাহিদুল ইছলাম, নাওবৈচাৰ চফিকুল ইছলাম, লালুকৰ আবু তাহেৰ, বৰপেটা জিলাৰ মাজৰগাঁৱৰ আন্নাছ আলী আৰু বৰপেটাৰ মহকলীৰ আব্দুল মালেক । আটকাধীন যুৱককেইজনক আৰক্ষীয়ে অধিক তথ্যৰ বাবে সোধা-পোছা অব্যাহত ৰাখিছে ।
প্ৰেৰক ফাৰুক হুছেইন