নিয়মীয়া বাৰ্তা ২৮ ফেব্ৰুৱাৰীঃ নগাঁও ভোগেশ্বৰী ফুকননী অসামৰিক চিকিৎসালয়ৰ ছুইপাৰ দীপলাল বাজফৰে চাকৰি জীৱনৰ ৩৪ বছৰত চিকিৎসালয়ৰ প’ষ্টমর্টেম কক্ষত মৰণোত্তৰ পৰীক্ষাৰ বাবে কটা–ফলা কৰিবলগীয়া হৈছে প্রায় ৭০ হাজাৰ শৱদেহ৷ এইদীপলাল নহ’লে চিকিৎসালয়খনত মৰণোত্তৰ পৰীক্ষা সম্ভৱ নহয়৷ কিয়নো মৃতদেহ এটা তেওঁ কটাৰ পিছত তাক প্রত্যক্ষ কৰি চিকিৎসকে মৰণোত্তৰ পৰীক্ষাৰ প্রতিবেদন লিখে৷ নিতৌ মৃতদেহৰ লগতে ব্যস্ত থাকিলেও দীপলালৰো আছে অন্য দহজনৰ নিচিনা এখন হূদয়৷ প’ষ্টমর্টেম টেবুলত কেতিয়াবা মৃতদেহ তুলি লৈ আৱেগিক হৈ পৰে তেওঁ৷ এই সন্দর্ভত বাজফৰে জনোৱা মতে, তেওঁ নগাঁও শ্বহীদ ভোগেশ্বৰী ফুকননী অসামৰিক চিকিৎসালয়ত এজন চাফাই কর্মী (ছুইপাৰ) হিচাপে চাকৰিত যোগদান কৰিছিল ১৯৮৬ চনত৷ প্রথম তিনি মাহ চিকিৎসালয়খনৰ অধীক্ষকৰ কার্যালয়ত চাফাই কর্মচাৰী হিচাপে নিয়োজিত হোৱাৰ পিছত তেওঁক নিয়োগ কৰা হয় চিকিৎসালয়খনৰ মৰণোত্তৰ পৰীক্ষা কক্ষত৷ তেতিয়াৰ পৰা আজি পর্যন্ত সুদীর্ঘ ৩৪ বছৰ তেওঁ প’ষ্টমর্টেম কক্ষত মৃতদেহ কটা–ছিঙা কৰা কামত নিয়োজিত হৈ আছে৷ প্রথম যিদিনা প’ষ্টমর্টেম ৱার্ডত টেবুলত মৃতদেহ এটা তুলি হাতত ছার্জিকেল ব্লেড লৈ মৃতদেহটো কাটিবলৈ লৈছিল, তেতিয়া তেওঁৰ ভয় লাগিছিল৷ মনটো ভাল লগা নাছিল৷ যাৰ বাবে প্রথম তিনি মাহমান নিশা ভালকৈ শুৱই পৰা নাছিল৷ সপোনত প’ষ্টমর্টেম টেবুলত কটা মৃতদেহবোৰ দেখা পাই শিহৰি উঠিছিল৷ তেওঁ কয়, ‘ত্রিশ বছৰমানৰ আগৰ কথা৷ সেইদিনা প’ষ্টমর্টেম টেবুলত এজনী কণমানি ছোৱালীৰ মৃতদেহ তুলি লৈ যেতিয়া প’ষ্টমর্টেম কৰিবলৈ হাতত ছার্জিকেল ব্লেড তুলি লৈছিলো, মোৰ হাত দুখন থৰ থৰকৈ কঁপিছিল৷ দুচকু সেমেকি উঠিছিল৷ মই কণমনিটো কাটিবলৈ প্রথম অমান্তি হৈছিলোঁ যদিও চিকিৎসকগৰাকীয়ে মনা নাছিল৷ কাৰণ প’ষ্টমর্টেমত পেট বা মূৰ ফালাটো নিয়ম৷ অনিচ্ছা সত্ত্বেও অৱশেষত পেটটো ফালিব লগা হৈছিল৷ সেইদিনা ৰাতি মোৰ টোপনি হোৱা নাছিল৷ নিশা বিভিন্ন অলৌকিক সপোন দেখি ভয় খাইছিলোঁ৷ ‘ইপিনে, প’ষ্টমর্টেম কৰিবলৈ আত্মহত্যা কৰা, দুর্ঘটনাত পতিত হৈ মৃত্যু হোৱাসহ অস্বাভাৱিক মৃত্যু হোৱা লোকৰ মৃতদেহবোৰ প’ষ্টমর্টেম টেবুলত তুলি লৈ ছার্জিকেল ব্লেডেৰে বুকুৰ পৰা তল পেটলৈ ফালিব লাগে দীপলালে৷ তেওঁ এই কামটোকে সুদীর্ঘ ৩৪ বছৰে কৰি আহিলেও আজিও যিকোনো শিশুৰ মৃতদেহ প’ষ্টমর্টেম টেবুলত দেখিলেই তেওঁক দুখে হেঁচা মাৰি ধৰেবুলি অকপটে প্রকাশ কৰিলে৷ দীপলালে লগতে কয় যে ৩৪ বছৰে তেওঁ ৭০ হাজাৰৰো অধিক বিভিন্ন মৃতদেহ প’ষ্টমর্টেম কৰিবলৈ কটা–ফলা কৰিছে৷ কিন্তু যেতিয়াই কোনো শিশুৰ মৃতদেহ প’ষ্টমর্টেম কৰিবলৈ প’ষ্টমর্টেম টেবুলত থৈ হাতত ছার্জিকেল ব্লেডখন তুলি লয়, তেতিয়াই তেওঁৰ হাত কঁপি উঠে৷দুর্ঘটনাত মৃত্যু হোৱা কোনো শিশুৰ মৃতদেহ যেতিয়া প’ষ্টমর্টেম কৰিবলৈ আনে, তেতিয়া অভিভাৱকসকলে প’ষ্টমর্টেমৰ বাবে কাটিব নিদিয়ে৷ কান্দোনত গগন ফালে তেওঁলোকে৷ বৰ দুখ লাগে৷ তদুপৰি, ডেকা–গাভৰুৰ মৃতদেহো প’ষ্টমর্টেমৰ কাৰণে কাটিবলৈ বেয়া লাগে৷ নগাঁও ভোগেশ্বৰী ফুকননী অসামৰিক চিকিৎসালয়ত প’ষ্টমর্টেম কৰিবলৈ দৈনিক কমেও পাঁচটাকৈ মৃতদেহ অনা হয় বুলি প্রকাশ কৰে৷ উল্লেখ্য যে হৰিজন সম্প্রদায়ৰ লোক হ’লেও দীপলালে নাখায় কোনো ৰাগিয়াল দ্রব্য৷ এইদৰে তেওঁ এক নজিৰ সৃষ্টি কৰা কাম সুদীর্ঘ বছৰ ধৰি কৰি আহিছে৷ দীপলালৰ এনে জীৱনগাথাই নগাঁৱত সকলোৰে আকর্ষণৰ কেন্দ্রবিন্দু হৈ পৰিছে৷