নিয়মীয়া বাৰ্তা ১১ মাৰ্চঃ মহানগৰীৰ প্রাগজ্যোতিষপুৰ থানা এলেকাৰ পশ্চিম মায়ঙৰ এগৰাকী ১৩ বছৰীয়া কিশোৰীক যৌন নির্যাতন চলাই ৰঙা ঘৰৰ আলহী হ’ল দুই সন্তানৰ পিতৃ৷ জানিব পৰা মতে যোৱা ৪ মার্চত কিশোৰীগৰাকীৰ পৰিয়ালৰ লোক ঘৰত নথকাৰ সুযোগ লৈ অঞ্চলটোৰ লম্পট চৰিত্রৰ বৰুণ বিশ্বাসে কিশোৰীগৰাকীক চকলেট দিয়াৰ প্রলোভন দি নিজ বাসগৃহলৈ লৈ যায়৷ লম্পট বৰুণে কিশোৰীগৰাকীক ঘৰলৈ মাতি নি যৌন নির্যাতন চলায়৷ পিছত কিশোৰীগৰাকীয়ে সকলো কথা পৰিয়ালৰ আগত বিৱৰি কোৱাত পৰিয়ালৰ লোকে ঘটনা সন্দর্ভত প্রাগজ্যোতিষপুৰ থানাত এখন এজাহাৰ দাখিল কৰে৷ আৰক্ষীয়ে ঘটনা সন্দর্ভত এক গোচৰ ৰুজু কৰি অভিযুক্ত বৰুণ বিশ্বাসক আটক কৰাৰ বাবে অভিযান চলায় যদিও অভিযুক্ত বৰুণ বিশ্বাসে আত্মগোপন কৰে৷ অৱশেষত আৰক্ষীয়ে এক গোপন সূত্রৰ পম খেদি নগাঁও জিলাৰ কচুৱা গাঁৱত অভিযান চলাই অভিযুক্ত বৰুণ বিশ্বাসক গ্রেপ্তাৰ কৰে৷ আজি আৰক্ষীয়ে অভিযুক্ত বৰুণ বিশ্বাসক জে’ল হাজোতলৈ প্রেৰণ কৰে৷