🔹 আইপিএলৰ নিলামৰ পূৰ্বে ক্ষুণ্ণ
নিউজ ডেস্ক, ২২ নৱেম্বৰ : আইপিএলৰ আগন্তুক মেগা নিলামক কেন্দ্র কৰি জল্পনা–কল্পনা অব্যাহত আছে৷ মেগা নিলামৰ দিন চমু চাপি অহাৰ লগে লগে এই সন্দর্ভত চর্চাও তীব্রতৰ হৈ পৰিছে৷ ২৪–২৫ নৱেম্বৰত ছৌদি আৰবৰ জেদ্দাহত অনুষ্ঠিত হ’ব এই মেগা নিলাম৷ ইফালে, এই নিলামত খেলুৱৈসকলক ক্রয় কৰিবলগীয়া সম্ভাব্য দল আৰু তেওঁলোকৰ সম্ভাব্য দৰ সন্দর্ভত যথেষ্ট আলোচনা হৈছে৷ ভাৰতীয় দলৰ অভিজ্ঞ পেচাৰ মহম্মদ ছামি সন্দর্ভতো নিলামকেন্দ্রিক এনে ভৱিষ্যদ্বাণী কৰিছে বহু ক্রিকেট অনুৰাগী তথা বিশেষজ্ঞই৷ কিন্তু এক ভৱিষ্যদ্বাণীত ক্ষুণ্ণ হৈ মহম্মদ ছামিয়ে প্রকাশ কৰিছে তীব্র প্রতিক্রিয়া৷ প্রাক্তন ভাৰতীয় ক্রিকেটাৰ সঞ্জয় মঞ্জৰেকাৰে ভৱিষ্যদ্বাণী কৰিছিল যে আইপিএলৰ আগন্তুক মেগা নিলামত ছামিৰ দৰ পূর্বতকৈ হ্রাস পাব৷ পিছে মঞ্জৰেকাৰৰ এই ভৱিষ্যদ্বাণীত অসন্তুষ্ট হ’ল মহম্মদ ছামি আৰু সামাজিক মাধ্যমত মুকলিকৈয়ে ছামিয়ে মঞ্জৰেকাৰক উদ্দেশ্যি তীব্র বিদ্রূপ কৰে৷ ছামিয়ে নিজৰ ইনষ্টাগ্রাম একাউণ্টযোগে মঞ্জৰেকাৰে কৰা ভৱিষ্যদ্বাণীৰ বিষয়ত প্রতিক্রিয়া প্রকাশ কৰি ‘জয় বাবাজী’ বুলি সম্বোধন কৰিছে প্রাক্তন ক্রিকেটাৰগৰাকীক৷ ইয়াতেহ ক্ষান্ত নহ’ল ছামি৷ মঞ্জৰেকাৰক উদ্দেশ্যি উপদেশো আগবঢ়াইছে পেচাৰগৰাকীয়ে৷ মঞ্জৰেকাৰক ভৱিষ্যতৰ বাবেও কিছু জ্ঞান জমা কৰি ৰাখিবলৈ উপদেশ দিছে ছামিয়ে৷ লগতে যদি কোনোবাই নিজৰ ভৱিষ্যৎ জানিব বিচাৰে, তেন্তে সঞ্জয় মঞ্জৰেকাৰক লগ কৰিব লাগে বুলিও ছামিয়ে কটাক্ষ কৰে৷