নিয়মীয়া বাৰ্তা ডিজিটেল, ২৭ নৱেম্বৰঃ আইপিএল ২০২৫ৰ মেগা নিলামত ক্রয় কৰা সকলোতকৈ কম বয়সীয়া খেলুৱৈ হিচাপে পৰিগণিত বিহাৰৰ এগৰাকী খেলুৱৈ৷ বয়সৰ দিশেৰে খেলুৱৈগৰাকীয়ে আইপিএলৰ নিলামৰ ইতিহাসত লিপিবদ্ধ কৰিছে নিজৰ নাম৷ ছৌদি আৰবৰ জেদ্দাত অনুষ্ঠিত নিলামত খেলুৱৈগৰাকীক ১ কোটি ১০ লাখ টকাত ক্রয় কৰে ৰাজস্থান ৰয়েলছে৷ যাৰ বাবে এটা সন্ধিয়াৰ ভিতৰতে কোটিপতিত পৰিণত হয় বিহাৰৰ বৈভৱ সূর্যবংশী নামৰ খেলুৱৈগৰাকী৷ আইপিএলৰ অভিলেখ ভংগকাৰী নিলামৰ পিছৰে পৰা বৈভৱ সূর্যবংশীৰ বয়স সন্দর্ভত আৰম্ভ হয় বিতর্ক৷ খেলুৱৈগৰাকীয়ে বয়সৰ ফাকি দিয়াৰ ঘটনা ক্রমাৎ পোহৰলৈ আহিবলৈ আৰম্ভ কৰে৷ খেলুৱৈগৰাকীৰ প্রকৃত বয়স লুকুৱাই ৰখা বুলি বিতর্ক আৰম্ভ হোৱাৰ পিছতে পিতৃয়েও প্রকাশ কৰিছিল প্রতিক্রিয়া৷ বৈভৱৰ পিতৃ সঞ্জীৱ সূর্যবংশীয়ে এক স্পষ্টীকৰণ দি কয় যে প্রয়োজন হ’লে তেওঁ পুত্রৰ বোন টেষ্ট কৰিবলৈ সাজু৷ এই সন্দর্ভত সঞ্জীৱ সূর্যবংশীয়ে সংবাদ প্রতিষ্ঠানক দিয়া ভাষ্য আছিল এনেধৰণৰ– যেতিয়া বৈভৱৰ বয়স আঠ বছৰ আছিল, তেতিয়া তেওঁ প্রথমবাৰৰ বাবে বোন টেষ্ট কৰা হৈছিল৷ তেওঁ ইতিমধ্যে ভাৰতৰ অনূর্ধ্ব–১৯ দলৰ হৈ খেলিছে৷ আমি কাকো ভয় নকৰোঁ৷ তেওঁৰ পুনৰ বয়স পৰীক্ষা কৰিব পাৰোঁ৷ ৩০ লাখ টকাৰ আধাৰ মূল্যৰ সৈতে বিহাৰৰ সমষ্টিপুৰৰ বাসিন্দা বৈভৱে শেহতীয়াকৈ ১৯ বছৰ অনুর্ধ্বৰ টেষ্টত দ্রুততম শতক অর্জন কৰিছে৷ চলিত বছৰৰ অক্টোবৰত চেন্নাইত অষ্ট্রেলিয়াৰ বিৰুদ্ধে এই কৃতিত্ব অর্জন কৰে খেলুৱৈগৰাকীয়ে৷ ১৩ বছৰীয়া বৈভৱ ভাৰতৰ ১৯ বছৰ অনুর্ধ্ব দলৰ হৈ মাত্র ৫৮টা বলত অর্ধশতক সম্পূর্ণ কৰে৷ এই বছৰৰ আৰম্ভণিতে সূর্যবংশীয়ে বাতৰিৰ শিৰোনাম দখল কৰিছিল৷ তেওঁ মাত্র ১২ বছৰ বয়সত বিহাৰৰ হৈ ৰঞ্জি ট্ৰফীত আত্মপ্রকাশ কৰিছিল আৰু ভাৰতৰ প্রিমিয়াৰ লীগৰ প্রথম শ্রেণীৰ প্রতিযোগিতাৰ সর্বকনিষ্ঠ খেলুৱৈত পৰিণত হৈছিল৷ বর্তমান আইপিএলৰ নিলামত ঐতিহাসিক চুক্তিৰ পিছত যুৱ খেলুৱৈজনক পৰৱর্তী ছিজনত ৰাজস্থান ৰয়েলছত দেখা যাব৷