নিয়মীয়া বাৰ্তা, ১২ মাৰ্চ : কাছাৰ আৰক্ষীয়ে বৰাক উপত্যকাৰ পৰা ৰাজস্থানত সৰবৰাহ কৰি বিক্ৰী হোৱা ৩ গৰাকী নাবালিকাক উদ্ধাৰ কৰিবলৈ সক্ষম হৈছে। আজি শিলচৰত সংবাদ মেলত কাছাৰৰ আৰক্ষী অধীক্ষক নোমল মাহাত্তাই এই কথা সদৰী কৰিছে। তেওঁ কয় যে কাটিগড়া সমষ্টিৰ দুগৰাকী আৰু শ্ৰীভূমি জিলাৰ পাথাৰকান্দিৰ এগৰাকী নিৰুদ্দিষ্ট কিশোৰীক উদ্ধাৰ কৰা হৈছে। লগতে ঘটনাৰ সৈতে জড়িত প্ৰধান অভিযুক্ত লীলা ৰামক গ্ৰেপ্তাৰ কৰি শিলচৰলৈ অনা হৈছে। তদুপৰি আন দুগৰাকী অভিযুক্ত ৰূপালী দত্ত আৰু গংগা গঞ্জু নামৰ মহিলা পলাতক অৱস্থাত আছে। আৰক্ষী অধীক্ষক নোমল মাহাত্তাই কয় যে, চলিত বৰ্ষৰ ২৪ জানুৱাৰীত কাটিগড়া সমষ্টিৰ গুমৰা নিবাসী তথা নিৰুদ্দেশ হোৱা নাবালিকাৰ পিতৃয়ে দাখিল কৰা এজাহাৰৰ ভিত্তিত জানিব পৰা যায় যে ৫ জানুৱাৰীত ৰূপালী দত্ত আৰু গংগা গঞ্জু নামৰ মহিলাই দুগৰাকী কিশোৰীক চাকৰি দিয়াৰ ভুয়া আশ্বাস দি অচিনাকি স্থানলৈ লৈ যায়। আনহাতে এগৰাকীয়ে কেনেবাকৈ সেই ঠাইৰ পৰা পলায়ন কৰিবলৈ সক্ষম হোৱাৰ বিপৰীতে আন এগৰাকী নিৰুদ্দেশ হৈ যায়। পিছত ঘৰ পোৱাৰ লগে লগে পলাই অহাগৰাকীয়ে প্ৰকাশ কৰে যে তেওঁলোকক কোনোবা অচিনাকি ব্যক্তিক বিয়া কৰাবলৈ সাজু হ’বলৈ বাধ্য কৰা হৈছিল। এই তথ্য লাভ কৰাৰ লগে লগে কালাইন আৰক্ষীয়ে এটা গোচৰ পঞ্জীয়ন কৰে আৰু নিৰুদ্দিষ্ট কিশোৰীগৰাকীৰ অচিনাকি নম্বৰৰ পৰা এটা ফোন কল কৰে, আৰু কাছাৰ আৰক্ষীয়ে ৰাজস্থান বুলি ফোনটো ট্ৰেচ কৰে। কোনো পলম নকৰাকৈ চাৰিজনীয়া এটা বিশেষ দল গঠন কৰি ৰাজস্থানৰ জয়পুৰ (গ্ৰাম্য)লৈ প্ৰেৰণ কৰা হয় । আৰু সেই জিলাৰ এছ পি আই পি এছ আনন্দ শৰ্মা আৰু চান্দৱাজী থানাৰ আৰক্ষীৰ সহযোগত ভুক্তভোগীগৰাকীক উদ্ধাৰ কৰিবলৈ সক্ষম হয়। আৰক্ষী অধীক্ষক নোমল মাহাত্তাই কয়, শ্ৰীভূমি জিলাৰ পাথাৰকান্দিৰ আন এগৰাকী নিৰুদ্দেশ হোৱা কিশোৰীক উদ্ধাৰ কৰা হৈছে। অসম আৰক্ষীৰ এটা দল আৰু স্থানীয় উপভাষাত কথা কোৱা দেখি তেওঁলোকৰ ওচৰলৈ সহায়ৰ বাবে আহে আৰু তেওঁ কয় যে তেওঁকো একেধৰণে সৰবৰাহ কৰা হৈছে। এই নতুন ঘটনাৰ বিষয়ে এছ পি কাছাৰক অৱগত কৰা হৈছিল যিয়ে পাছলৈ ডিজিপি হৰমীত সিঙৰ পৰামৰ্শমতে ট্ৰেনজিট ৰিমাণ্ডলৈ যোৱা ৭ মাৰ্চত বিমানযোগে উভতাই অনা হয়। ইপিনে নাবালিকা কিশোৰীক বিয়া কৰাই দিয়া প্ৰধান অভিযুক্ত লীলা ৰামক গ্ৰেপ্তাৰ কৰি শিলচৰলৈ অনা হৈছে। অৱশ্যে দুয়োগৰাকী মহিলা ৰূপালী দত্ত আৰু গংগা গঞ্জু এতিয়াও পলাতক হৈ আছে। আৰক্ষী অধীক্ষক নোমল মাহাত্তাই কয় যে, এই অপৰাধৰ সৈতে জড়িত সকলো দোষী আৰু সমগ্ৰ অসমতে বিয়পি পৰা তেওঁলোকৰ এজেণ্টক গ্ৰেপ্তাৰ নকৰালৈকে তেওঁলোকে গোচৰটো বন্ধ নকৰে। ইপিনে এই নাবালিকাকেইজনীক উদ্ধাৰৰ বাবে বৰাক চাহ শ্রমিক ইউনিয়নৰ সদস্য চন্দন কৰ্মকাৰে আৰক্ষী অধীক্ষক নোমল মাহাত্তা, ডি জি পি হৰমীত সিং আৰু মুখ্যমন্ত্রী ড০ হিমন্ত বিশ্ব শর্মাক ধন্যবাদ জ্ঞাপন কৰিছে৷
প্ৰেৰক গৌতম তালুকদাৰ