নিয়মীয়া বাৰ্তা, ২০ মাৰ্চঃ মাৰাত্মক ক’ৰোনা ভাইৰাছ প্রতিৰোধ কৰিবলৈ কেন্দ্রীয় চৰকাৰে আৰম্ভ কৰা সজাগতামূলক কার্যসূচীৰ অংশস্বৰূপে কেন্দ্রীয় ক্রীড়া মন্ত্রালয়ে বৃহস্পতিবাৰে এক নতুন নির্দেশনা জাৰি কৰে৷
এই অনুসৰি অহা ১৫ এপ্রিল পর্যন্ত দেশত ক্রীড়াৰ সৈতে জড়িত সকলো কার্যকলাপ বন্ধ থাকিব৷ কেন্দ্রীয় ক্রীড়ামন্ত্রী কিৰেণ ৰিজিজুৱে প্রকাশ কৰে যে নতুন নির্দেশনা অনুসৰি ১৫ এপ্রিল পর্যন্ত প্রশিক্ষণ কেন্দ্রসমূহো বন্ধ থাকিব৷ ‘কোনো খেলুৱৈ অথবা কাৰিকৰী বিষয়ববীয়াই এঠাইৰ পৰা আন ঠাইলৈ যোৱাৰ যাতে প্রয়োজন নহয়, সেয়া আমি নিশ্চিত কৰিছোঁ৷ যিকোনো ধৰণৰ জনসমাগমত নিষেধাজ্ঞা আৰোপ কৰা হৈছে৷ আনকি প্রশিক্ষণ কেন্দ্রসমূহত থকা হোষ্টেলো বন্ধ কৰি দিয়া হৈছে৷ অৱশ্যে অলিম্পিকৰ প্রস্তুতিত ব্যস্ত থকা এথলীটসকলৰ অনুশীলন প্রক্রিয়া অব্যাহত থাকিব৷ তেওঁলোকৰ অনুশীলন শিবিৰত বাহিৰৰ পৰা অহা ব্যক্তিৰ প্রৱেশ নিষিদ্ধ কৰা হৈছে৷’– কিৰেণ ৰিজিজুৱে এইদৰে কয়৷
ইয়াৰ পূর্বে কেন্দ্রীয় ক্রীড়া মন্ত্রালয়ে ক’ৰোনা ভাইৰাছৰ সম্প্রসাৰণ প্রতিৰোধ কৰিবলৈ অহা ৩১ মার্চ পর্যন্ত দেশত সকলো ধৰণৰ ক্রীড়া ইভেণ্ট বাতিল কৰিছিল৷