আহমেদাবাদ বিমান দুৰ্ঘটনা-ৰ প্ৰাৰম্ভিক প্ৰতিবেদনত চমকপ্ৰদ তথ্য উন্মোচিত

আহমেদাবাদ বিমান দুৰ্ঘটনা : আহমেদাবাদত ১২ জুনত এয়াৰ ইণ্ডিয়াৰ এখন ব’ইং ৭৮৭-৮ বিমান টেকঅফ কৰাৰ কেইছেকেণ্ডৰ ভিতৰতেই দুৰ্ঘটনাগ্ৰস্ত হয়। এই ঘটনাক লৈ ভাৰতীয় বিমান দুৰ্ঘটনা অনুসন্ধান বুৰ’ (AAIB)-এ ইতিমধ্যে প্ৰাৰম্ভিক অনুসন্ধান প্ৰতিবেদন প্ৰকাশ কৰিছে। উক্ত প্ৰতিবেদনত কিছুমান আকৰ্ষণীয় তথা চমকপ্ৰদ তথ্য প্ৰকাশ পোৱা গৈছে। প্ৰতিবেদন অনুসৰি, টেকঅফৰ পিছতে বিমানখনৰ দুয়োটা ইঞ্জিন হঠাতে বন্ধ হৈ পৰে, ফলত বিমানখনে শক্তি হেৰুৱায় আৰু দুৰ্ঘটনাগ্ৰস্ত হয়।

AAIB-ৰ প্ৰতিবেদনত কি কোৱা হৈছে?

AAIB-ৰ প্ৰতিবেদন অনুসৰি, বিমানখনে স্বাভাৱিকভাৱে টেকঅফ কৰিছিল। সকলো কিছু সাধাৰণ আছিল আৰু ই প্ৰয়োজনীয় উচ্চতালৈও উঠি গৈছিল। কিন্তু তেতিয়াই ইঞ্জিন দুটাৰ ফুয়েল কাটঅফ চুইচ ‘ৰান’ (Run) অৱস্থাৰ পৰা ‘কাটঅফ’ (Cutoff) অৱস্থালৈ সলনি হয়। এইটোৰ অৰ্থ হৈছে ইঞ্জিনলৈ ইন্ধন যোৱা বন্ধ হৈ যোৱা। ইন্ধন নোপোৱাত ইঞ্জিন দুটা বন্ধ হৈ পৰে আৰু ফলস্বৰূপে বিমানখন দুৰ্ঘটনাগ্ৰস্ত হয়।

পাইলটৰ কথোপকথনৰ উন্মোচন

প্ৰতিবেদনখনত বিমানখনৰ দুজন পাইলট সুমীত সভৰৱাল আৰু সহঃ পাইলট ক্লাইভ কুন্দৰৰ মাজত হোৱা কথোপকথনো উন্মোচিত হৈছে। কথোপকথন আছিল এনেধৰণ-

• প্ৰথম পাইলট: “আপুনি ছুইচ কিয় বন্ধ কৰিলে?”

• দ্বিতীয় পাইলট : “মই বন্ধ কৰা নাই।”

এই কথোপকথনৰ পৰা স্পষ্ট হয় যে কোনো পাইলটে ইঞ্জিন ইচ্ছাকৃতভাৱে বন্ধ কৰা নাছিল। এই ঘটনাটো হয়তো প্ৰযুক্তিগত বিভ্ৰাটৰ ফল হ’ব পাৰে, যদিও মানৱীয় ভুলৰ সম্ভাৱনাও অগ্ৰাহ্য কৰা হোৱা নাই। এতিয়াও দুৰ্ঘটনাটোৰ বিস্তৃত তদন্ত চলি আছে।

ইঞ্জিন খোলাৰ চেষ্টা কৰিছিল

ইঞ্জিন বন্ধ হোৱাৰ পাছত ৰেম এয়াৰ টাৰবাইন (RAT) বাহিৰলৈ ওলাই আহে, যাৰ অৰ্থ হৈছে বিমানখনৰ ইমাৰ্জেঞ্চি পাৱাৰৰ প্ৰয়োজন আছিল। পাইলটসকলে ইঞ্জিন পুনৰ সক্ৰিয় কৰাৰ চেষ্টা কৰিছিল, কিন্তু তেতিয়ালৈকে বহুত বিলম্ব হৈ গৈছিল। বিমানখন যথেষ্ট উচ্চতালৈ উঠিব পৰা নাছিল আৰু বিমানবন্দৰৰ পাৰ হৈয়ে দুৰ্ঘটনাত পতিত হয়।

এই দুৰ্ঘটনাই পুনৰ এবাৰ বিমানৰ প্ৰযুক্তিগত নিৰ্ভৰযোগ্যতা, পাইলটৰ সিদ্ধান্ত আৰু যাত্ৰীৰ সুৰক্ষা সম্পৰ্কে গুৰুত্বপূৰ্ণ প্ৰশ্ন উত্থাপন কৰিছে।

Niyomiya Barta Desk, 12 July, 2025