নিয়মীয়া বাৰ্তা, ২৮ মাৰ্চঃ দেশজুৰি ক’ৰোনা ভাইৰাছ সংক্ৰমণৰ ঘটনা বৃদ্ধি পোৱাৰ সময়তে ভাৰতীয় ৰে’লে গ্ৰহণ কৰিছে এক অভিনৱ পদক্ষেপ । দেশৰ প্ৰায়সংখ্যক ৰে’লতেই এতিয়া প্ৰস্তুত কৰি উলিওৱা হৈছে আছুতীয়া বিচনাৰ লগতে আইচিইউ ।
এইক্ষেত্ৰত যেন বিশেষভাৱে সাজু হৈ উঠিছে গুৱাহাটীৰ কামাখ্যা ৰে’লৱে ষ্টেচন । ষ্টেচনটোত থকা ৰে’লৰ ডবাতেই এতিয়া এখন হাস্পতালৰ সকলো সুবিধা উপলব্ধ হ’ব । মাত্ৰ ২৪ ঘণ্টাৰ ভিতৰত ৰে’লৰ ডবাত প্ৰস্তুত কৰি উলিওৱা হৈছে এইসমূহ আছুতীয়া বিচনা । মুঠ ১০ টা ডবাত প্ৰতিটো ডবাতে আছে ৯ খনকৈ বিচনা । য’ত ৰখা হ’ব ক’ৰোনা আক্ৰান্ত ৰোগীক । ইফালে, ৰে’লৰ ডবাতেই আছে আইচিইউ কক্ষ ।
যি সময়ত ৰাজ্য চৰকাৰে ক’ৰোনাৰ সৈতে মোকাবিলা কৰাৰ বাবে সকলো ধৰণৰ প্ৰস্তুতি গঢ়ি তুলিছে তেনে এক সময়তে ভাৰতীয় ৰে’লৱেৰ এই পদক্ষেপক শলাগ লৈছে সকলোৱে । দেশৰ এনে সংকটপূৰ্ণ সময়ত সকলোৱে যেন ধৰাশায়ী কৰিব খুজিছে মহামাৰী ক’ৰোনাক ।