মিঞা বাংলাদেশীৰ সমর্থনত থিয় দিয়া কংগ্রেছক হুংকাৰ দি আজি নির্বাচনী সভাত বিৰোধী দলটোক উদ্দেশ্যি মুখ্যমন্ত্রী ড০ হিমন্ত বিশ্ব শর্মাৰ মন্তব্য– সংলাপ নতুনকৈ লিখক৷ মাথোঁ এখন যুঁজ নহয়, এইবাৰ যুঁজ ভয়ংকৰ হ’ব৷
আজি বিহপুৰীয়াত দলীয় প্রার্থী ভূপেন বৰাক কাষত লৈ মুখ্যমন্ত্রী ড০ শর্মাই ভাষণত কয়–মই কংগ্রেছ আৰু কংগ্রেছ দলৰ সভাপতি গৌৰৱ গগৈক ক’ব খোজোঁ আমাৰ অসমীয়াই বাংলাদেশীক কেতিয়াও স্বীকাৰ নকৰে৷ আমি বাংলাদেশীৰ লগত যুঁজিম আৰু জিকিম৷ কংগ্রেছে কৈ আহিছে এখন যুঁজ হ’ব বুলি৷
মই কংগ্রেছক ক’ব বিচাৰোঁ, এইবাৰ যুঁজ নহয়, ভয়ংকৰ যুঁজ হ’ব বাংলাদেশীৰ লগত৷ বাংলাদেশীক মই শান্তিৰে থাকিব নিদিওঁ৷ সেইকাৰণে কংগ্রেছক কৈছোঁ– তেওঁলোকে সংলাপ নতুনকৈ লিখক৷ এইবাৰ যুঁজ এখন নহয়, বাংলাদেশীৰ লগত ভয়ংকৰ যুঁজ হ’ব৷ উল্লেখ্য যে নামনি অসমত নির্বাচনী প্রচাৰৰ জোঁৱাৰ তুলি আজি উত্তৰ অসমত চাৰিটা সমষ্টিত মুখ্যমন্ত্রীয়ে আৰম্ভ কৰা প্রচাৰ অভিযানত দেখা গ’ল লক্ষাধিক ৰাইজ৷
জাতি–মাটি–ভেটিৰ শ্ল’গানৰ লগতে এইবাৰ মুখ্যমন্ত্রী ড০ শর্মাৰ নতুন শ্ল’গান হ’ল ৰুটী–মাটি আৰু বেটী৷ ৰুটী–মাটি– বেটী ৰক্ষাৰ বাবে ৰাইজৰ পৰা আশীর্বাদ বিচাৰিলে মুখ্যমন্ত্রীয়ে৷ তেওঁ কয়– অসমত এটা নতুন বাতাবৰণ সৃষ্টি কৰাই আছিল আমাৰ লক্ষ্য৷ যোৱা ৫টা বছৰত মই প্রচেষ্টা চলাইছিলোঁ যে বাংলাদেশী মিঞাসকলে যাতে অসমৰ ৰাইজৰ বুকুত কামোৰ মাৰিব নোৱাৰে, অসমখন যাতে সুৰক্ষিত হৈ থাকে৷
যোৱা ৫ বছৰত আমি ডেৰলাখতকৈ অধিক বিঘা ভূমি বাংলাদেশীৰ পৰা উচ্ছেদ কৰি তেওঁলোকক শিকাই দিলোঁ– আমাক যদি কোনোবাই ৰঙা চকু দেখুৱায়, আমিও ৰাজনৈতিকভাৱে বহি নাথাকোঁ৷ অসমীয়াৰ হাততো শক্তি আছে, তেওঁলোকৰ হাত–ভৰি ভাঙি দিবৰ বাবে৷ গৌৰৱ গগৈক তীব্র সমালোচনা কৰি মুখ্যমন্ত্রীয়ে কয়– মই কংগ্রেছক কৈছোঁ নতুন বৰ অসম আমি কৰিব নিদিওঁ৷
নতুন বৰ অসমত বাংলাদেশী থাকিব৷ আমাক নতুন বৰ অসম নালাগে৷ চাওলুং চ্যুকাফা আৰু শংকৰদেৱে নির্মাণ কৰা পুৰণি বৰসমখনহে আমাক লাগে৷ আনহাতে বিহপুৰীয়া সমষ্টিক বাৰ বৈষ্ণৱৰ জন্মভূমি, মহাপুৰুষ মাধৱদেৱ, অনিৰুদ্ধ দেৱৰ পৱিত্রত জন্মস্থান বুলি উল্লেখ কৰি মুখ্যমন্ত্রীয়ে নির্বাচনী সভাত কয়– মই আপোনালোকৰ পৰা আশীর্বাদ বিচাৰিম৷
আমি জাতি–মাটি–ভেটি, ৰুটী–মাটি–বেটী ৰক্ষাৰ বাবে যি সংগ্রামত নামি পৰিছোঁ, সেই সংগ্রামত যেন দুহাত মেলি আপোনালোকে আশীর্বাদ দিয়ে৷ বিহপুৰীয়া সমষ্টি কেৱল সমষ্টি নহয়, ই অসমীয়াৰ স্বাভিমান বুলি উল্লেখ কৰি মুখ্যমন্ত্রীয়ে কয়– আমি এনে এখন অসম নির্মাণ কৰিব বিচাৰিছোঁ, যিখন অসমত আমাৰ প্রতিগৰাকী অসমীয়া, ভাৰতীয় সনাতনী মানুহ নিৰাপদে থাকে৷ বিহপুৰীয়া সমষ্টিত মাধৱদেৱ কলাক্ষেত্র, মাধৱদেৱ বিশ্ববিদ্যালয় এনেদৰে নির্মাণ হৈ উঠিব বুলি আমি কল্পনা কৰা নাছিলোঁ৷
বিহপুৰীয়া সমষ্টিক সমজিলালৈ ৰূপান্তৰিত কৰা হ’ব বুলিও আশ্বাস দি মুখ্যমন্ত্রীয়ে কয়– ভূপেন বৰাৰ জয় পৰাজয়ৰ লগত মোৰ আৰু আপোনালোকৰ মৰমৰ সম্বন্ধ আছে৷ ভূপেন বৰা জয় কৰাৰ দায়িত্ব আপোনালোকক দিলোঁ৷
নিয়মীয়া বার্তা, নাৰায়ণপুৰ