গম্ভীৰ কূটনীতি, গোলকীয় অর্থনীতিৰ জটিল সমীকৰণ আৰু বিশ্ব নেতাসকলৰ হাইপ্রফাইল বৈঠকৰ মাজতে ফ্রান্সৰ এভিয়ান–লে–বেইনছত অনুষ্ঠিত জি–৭ সন্মিলনৰ মজিয়াত এক আমোদজনক আৰু আকর্ষণীয় দৃশ্যই পুনৰ জোকাৰি গ’ল নেটিজেনক৷
বিশ্ব ৰাজনীতিৰ মঞ্চত পুনৰ চলিল মেল’ডীৰ যাদু৷ প্রধানমন্ত্রী নৰেন্দ্র মোদী আৰু ইটালীৰ প্রধানমন্ত্রী জর্জিয়া মেল’নিৰ চিৰপৰিচিত মধুৰ কেমিষ্ট্রীয়ে পুনৰ সকলোৰে দৃষ্টি আকর্ষণ কৰিলে৷ ইণ্টাৰনেটত ধুমুহাৰ সৃষ্টি কৰা বিখ্যাত মেল’ডী ট্রেণ্ডটোক স্বয়ং মেল’নিয়ে বিশ্বমঞ্চত স্বীকাৰ কৰি হাঁহিমুখে ক’লে– ইনষ্টাগ্রামত আমিয়েই এতিয়া আটাইতকৈ জনপ্রিয় যুটি৷
জি–৭ সন্মিলনৰ লগত সংগতি ৰাখি মার্কিন ৰাষ্ট্রপতি ড’নাল্ড ট্রাম্পসহ বিশ্বৰ অন্যান্য শীর্ষ নেতাসকলৰ পৰম্পৰাগত দলীয় ফটো তোলাৰ বাবে সমৱেত হোৱা আজি দেখা গ’ল এই ব্যতিক্রমী দৃশ্য৷ নেতাসকলৰ দীঘলীয়া শাৰী আৰু ভিৰ ফালি ইটালীৰ প্রধানমন্ত্রী জর্জিয়া মেল’নিয়ে হাঁহিমুখে প্রধানমন্ত্রী নৰেন্দ্র মোদীৰ ফালে আগুৱাই আহে আৰু দুয়ো কৰমর্দন কৰে৷
আন্তঃৰাষ্ট্রীয় সংবাদ মাধ্যমৰ সূত্র অনুসৰি মোদীয়ে মেল’নিক উদ্দেশ্যি তেওঁক লগ পাই আনন্দিত হোৱা বুলি কোৱাৰ পাছতে মেল’নিয়ে ইনষ্টাগ্রামৰ সেই আমোদজনক প্রসংগটো উল্লেখ কৰে৷ ইয়াৰ পাছতে দুয়ো হাস্যৰসত বুৰ যায়৷
ছ’চিয়েল মিডিয়াত এই মুহূর্তৰ ভিডিঅ’ ভাইৰেল হোৱাৰ লগে লগে নেটিজেনৰ উৎসাহ দুগুণে বৃদ্ধি পাইছে৷ প্রকৃততে মোদী আৰু মেল’নিৰ এই ডিজিটেল বন্ধুত্ব এতিয়া গোলকীয় ক্রেজত পৰিণত হৈছে৷
২০২৩ চনৰ এক দ্বিপাক্ষিক বৈঠকৰ পিছৰে পৰা ইণ্টাৰনেট ব্যৱহাৰকাৰীসকলে দুয়োৰে নাম সাঙুৰি মেল’ডী শব্দটোৰ সৃষ্টি কৰিছিল৷ কেৱল অনুৰাগীয়ে নহয়, স্বয়ং মেল’নিয়েও ইয়াৰ পূর্বে মোদীৰ সৈতে ছেল্ফি তুলি মেল’ডী শব্দটো ব্যৱহাৰ কৰি দিয়া পোষ্টৰ ট্রেণ্ডটোক আদৰি লৈছিল৷
শেহতীয়াভাৱে ৰোম ভ্রমণৰ সময়ত প্রধানমন্ত্রী মোদীয়ে মেল’নিক ভাৰতৰ বিখ্যাত পার্লে মেল’ডী টফী এটাৰ পেকেট উপহাৰ দিয়াৰ ভিডি’টোৱেও ব্যাপক চর্চা লাভ কৰিছিল৷ যাক লৈ নেটিজেনেও বিভিন্ন ধেমেলীয়া মন্তব্য কৰিছিল৷
অৱশ্যে কেৱল ছ’চিয়েল মিডিয়াৰ ৰসাত্মক চর্চাই নহয়, মোদী–মেল’নিৰ এই সুন্দৰ সম্পর্কই ভাৰত আৰু ইটালীৰ কূটনৈতিক বন্ধনক এক অভূতপূর্ব শক্তি প্রদান কৰিছে৷ বর্তমান দুয়োখন দেশৰ মাজত দ্বিপাক্ষিক বাণিজ্যৰ পৰিমাণ ১৬.৭৭ বিলিয়ন মার্কিন ডলাৰ অতিক্রম কৰিছে৷
তদুপৰি ভাৰত–মধ্যপ্রাচ্য–ই অর্থনৈতিক কৰিড’ৰৰ দৰে গুৰুত্বপূর্ণ সামৰিক তথা অর্থনৈতিক প্রকল্পত দুয়োখন দেশে অতি ঘনিষ্ঠভাৱে কাম কৰি আছে৷ গোলকীয় ৰাজনীতিৰ জটিলতাৰ মাজতো এইবাৰৰ জি–৭ সন্মিলনৰ এই বিশেষ মেল’ডী মুহূর্তটো সমগ্র বিশ্বৰ বাবে আটাইতকৈ চর্চিত আৰু আকর্ষণীয় খবৰ হৈ পৰিছে৷
ডিজিটেল ডেস্ক, ১৮ জুন