ফিফা বিশ্বকাপ ২০২৬ত সমালোচকৰ মুখ বন্ধ কৰি দুটা গ’লৰে উজলি উঠিল ক্ৰিষ্টিয়ানো ৰ’নাল্ডো। মঙলবাৰে হিউষ্টনত অনুষ্ঠিত গ্ৰুপ পৰ্যায়ৰ খেলত উজবেকিস্তানক ৫-০ গ’লৰ বিশাল ব্যৱধানত পৰাস্ত কৰি টুৰ্নামেণ্টৰ প্ৰথম জয় সাব্যস্ত কৰে ৰবাৰ্টো মাৰ্টিনেজৰ পৰ্তুগালে।
ৰ’নাল্ডোৰ দুটা গ’লৰ উপৰি নুনো মেণ্ডেছ আৰু ৰাফায়েল লিয়াওৱে এটাকৈ গ’ল কৰে। আনটো গ’ল উজবেকিস্তানৰ ডিফেণ্ডাৰ আব্দুকোদিৰ খুচানোভৰ আত্মঘাতী গ’লৰ ফলত আহে।
প্ৰথমখন খেলত ডি আৰ কংগোৰ বিৰুদ্ধে ১-১ গ’লৰ ড্ৰয়ে পৰ্তুগালক হতাশ কৰিছিল। সেই ফলাফলৰ পিছত বিশ্বকাপৰ অন্যতম শক্তিশালী দল হিচাপে বিবেচিত পৰ্তুগালৰ ওপৰত চাপ বৃদ্ধি পাইছিল। কিন্তু দ্বিতীয়খন খেলত আক্ৰমণাত্মক ফুটবল প্ৰদৰ্শন কৰি তেওঁলোকে নিজৰ শক্তিৰ পৰিচয় দিয়ে।
৪১ বছৰীয়া ক্ৰিষ্টিয়ানো ৰ’নাল্ডোক লৈ শেহতীয়াকৈ বহু সমালোচনা হৈছিল। বহুতে প্ৰশ্ন তুলিছিল যে ব্ৰুনো ফাৰ্নাণ্ডেছ, ভিতিনিয়া, নুনো মেণ্ডেছ আৰু বাৰ্নাৰ্ডো ছিলভাৰ দৰে তাৰকাৰে সমৃদ্ধ এই “সোণালী প্ৰজন্ম”ৰ পথত বাধা হৈ পৰিছে নেকি ৰ’নাল্ডো।
বিশ্বকাপ আৰু ইউৰো কাপ মিলাই বিগত ১০খন ডাঙৰ প্ৰতিযোগিতাৰ খেলত ৩৩টা শ্বট লোৱাৰ পিছতো গ’লৰ মুখ নেদেখাৰ বাবে তেওঁৰ ওপৰত সমালোচনা অধিক তীব্ৰ হৈছিল।
কিন্তু উজবেকিস্তানৰ বিৰুদ্ধে দুটা গ’ল কৰি পৰ্তুগালৰ অধিনায়কগৰাকীয়ে সকলো সমালোচনাৰ উত্তৰ দিলে।
আনহাতে, বিশ্বকাপত প্ৰথমবাৰৰ বাবে অংশগ্ৰহণ কৰা উজবেকিস্তানে প্ৰথমখন খেলত কলম্বিয়াৰ বিৰুদ্ধে ৩-১ ব্যৱধানত পৰাস্ত হৈছিল। যদিও পৰাজয় হৈছিল, তথাপিও আক্ৰমণাত্মক প্ৰদৰ্শনৰ বাবে দলটোৱে প্ৰশংসা লাভ কৰিছিল। কিন্তু পৰ্তুগালৰ শক্তিশালী আক্ৰমণৰ সন্মুখত তেওঁলোক সম্পূৰ্ণ অসহায় হৈ পৰে।
এই জয়ে বিশ্বকাপত পৰ্তুগালৰ অভিযানক নতুন গতি প্ৰদান কৰাৰ লগতে নকআউট পৰ্যায়ত প্ৰৱেশৰ আশা অধিক শক্তিশালী কৰি তুলিছে।
ডিজিটেল ডেস্ক, ২৪ জুন