ভিয়েটনামৰ ফু কুৱক (Phu Quoc) দ্বীপৰ ওচৰত ভাৰতীয় পৰ্যটক কঢ়িয়াই নিয়া এখন স্পীডবোট দুৰ্ঘটনাত পতিত হোৱাত এক শোকাৱহ দুৰ্ঘটনা সংঘটিত হৈছে। এই ঘটনাত ১৫জনৰ মৃত্যু হোৱাৰ লগতে ২১জনক জীৱন্তে উদ্ধাৰ কৰা হৈছে।
ভিয়েটনামস্থিত ভাৰতীয় দূতাবাসে জনোৱা অনুসৰি, ঘটনাটোৰ পাছতে স্থানীয় প্ৰশাসনৰ সৈতে নিৰন্তৰ যোগাযোগ ৰক্ষা কৰা হৈছে আৰু পৰিস্থিতিৰ ওপৰত কাষ চাপি নজৰ ৰখা হৈছে।
ভাৰতীয় দূতাবাসে এক্স (X)-ত প্ৰকাশ কৰা বিবৃতিত কয় যে, ফু কুৱক দ্বীপৰ সমীপত ভাৰতীয় পৰ্যটক কঢ়িয়াই নিয়া এখন নাও বাগৰি যোৱাটো এক অত্যন্ত দুখজনক ঘটনা। ঘটনাৰ সঠিক তথ্য সংগ্ৰহ কৰা হৈছে আৰু স্থানীয় প্ৰশাসনে ব্যাপক উদ্ধাৰ অভিযান চলাই আছে।
স্থানীয় কৰ্তৃপক্ষৰ তথ্য অনুসৰি, দুপৰীয়া প্ৰায় ১ বজাত Ocean Pier Island Company-ৰ এখন স্পীডবোট হন মেই (Hon May) ৰুটৰ পৰা এন থই (An Thoi) বন্দৰলৈ গৈ থকা অৱস্থাত বাগৰি যায়। এই স্থান ফু কুৱক বিমানবন্দৰৰ পৰা প্ৰায় ২৫ কিলোমিটাৰ দূৰত।
নাওখন উলটি যোৱাৰ লগে লগে তাত থকা মুঠ ৩৬জন লোক সাগৰত পৰি যায়। ওচৰত থকা আন পৰ্যটকবাহী নাওসমূহে লগে লগে সহায়ৰ বাবে আগবাঢ়ি আহে।
ঘটনাৰ পাছতে এন থই সীমান্ত সুৰক্ষা বাহিনীয়ে দুখন জাহাজ, ৩৫জন বিষয়ববীয়া আৰু জোৱান ঘটনাস্থললৈ প্ৰেৰণ কৰে। নৌসেনা, ক’ষ্ট গাৰ্ড আৰু আন সুৰক্ষা বাহিনীৰ সহযোগত চলা উদ্ধাৰ অভিযানত দুপৰীয়াৰ ভিতৰতে সকলো ৩৬জন যাত্ৰীক উদ্ধাৰ কৰি উপকূললৈ অনা হয়।
কৰ্তৃপক্ষই নিশ্চিত কৰিছে যে, ২১জন জীৱিত উদ্ধাৰ হৈছে, আনহাতে ১৫জনৰ মৃত্যু হৈছে, যিসকলৰ ভিতৰত ২গৰাকী মহিলা আৰু ১৩জন পুৰুষ আছে।
দুৰ্ঘটনাত ক্ষতিগ্ৰস্ত পৰিয়ালসমূহক সহায় আগবঢ়াবলৈ ভাৰতীয় দূতাবাসে দুটা কণ্ট্ৰ’ল ৰুম স্থাপন কৰিছে।
হো চি মিন চিটিৰ ভাৰতীয় কনছুলেটৰ হেল্পলাইন নম্বৰসমূহঃ
- +84 36 281 7930
- +84 91 552 37 14
- +84 33 452 0414
হানয়স্থিত কণ্ট্ৰ’ল ৰুমৰ নম্বৰঃ
- +84 91 308 9165
ভাৰতীয় দূতাবাসে জানিবলৈ দিছে যে, যিকোনো সহায় বা তথ্যৰ বাবে এই নম্বৰসমূহত যোগাযোগ কৰিব পাৰিব।
ডিজিটেল ডেস্ক, ১১ জুলাই