ভাৰত আৰু নিউজিলেণ্ডে দ্বিপাক্ষিক সম্পৰ্কক নতুন উচ্চতালৈ লৈ গৈ আনুষ্ঠানিকভাৱে ‘কৌশলগত অংশীদাৰিত্ব’ (Strategic Partnership)-ৰ মৰ্যাদা প্ৰদান কৰিছে। লগতে দুয়োখন দেশে ‘ইণ্ডিয়া–নিউজিলেণ্ড ষ্ট্ৰেটেজিক পাৰ্টনাৰশ্বিপ : ৰোডমেপ ২০৩০’-ত অনুমোদন জনাইছে। এই ৰোডমেপৰ জৰিয়তে আগন্তুক চাৰি বছৰত বাণিজ্য, কৃষি, নিৰাপত্তা, উদ্ভাৱন আৰু জনগণৰ সম্পৰ্ককে ধৰি বিভিন্ন ক্ষেত্ৰত সহযোগিতা অধিক শক্তিশালী কৰা হ’ব।
প্ৰধানমন্ত্ৰী নৰেন্দ্ৰ মোদীৰ নিউজিলেণ্ড ভ্ৰমণৰ সময়তে এই গুৰুত্বপূৰ্ণ সিদ্ধান্ত লোৱা হয়। উল্লেখযোগ্য যে যোৱা ৪০ বছৰত কোনো ভাৰতীয় প্ৰধানমন্ত্ৰীৰ এয়া প্ৰথম চৰকাৰী নিউজিলেণ্ড ভ্ৰমণ, যাক দুয়োখন দেশৰ সম্পৰ্কৰ ক্ষেত্ৰত এক ঐতিহাসিক পদক্ষেপ বুলি গণ্য কৰা হৈছে।
যৌথ বিবৃতি অনুসৰি, ভাৰত আৰু নিউজিলেণ্ডৰ প্ৰধানমন্ত্ৰীদ্বয়ে দ্বিপাক্ষিক সম্পৰ্কক ‘ষ্ট্ৰেটেজিক পাৰ্টনাৰশ্বিপ’-লৈ উন্নীত কৰাৰ সিদ্ধান্তত উপনীত হয়। ‘ৰোডমেপ ২০৩০’-ই আগন্তুক বছৰসমূহত দুয়োখন দেশৰ সহযোগিতাৰ মূল ভিত্তি হিচাপে কাম কৰিব।
দুয়োগৰাকী নেতাই কয় যে এই অংশীদাৰিত্বৰ লক্ষ্য হৈছে বৰ্তমানৰ সহযোগিতাক অধিক শক্তিশালী কৰা, নতুন ক্ষেত্ৰত একেলগে কাম কৰা আৰু দ্বিপাক্ষিকৰ লগতে বহুপাক্ষিক মঞ্চতো সহযোগিতা বৃদ্ধি কৰা।
‘ৰোডমেপ ২০৩০’ অনুসৰি, ২০৩০ চনৰ ভিতৰত ভাৰত–নিউজিলেণ্ডৰ দ্বিপাক্ষিক বাণিজ্য ৭ বিলিয়ন নিউজিলেণ্ড ডলাৰ (প্ৰায় ৩৫ হাজাৰ কোটি টকা)লৈ বৃদ্ধি কৰাৰ লক্ষ্য স্থিৰ কৰা হৈছে। ইয়াৰ বাবে বাণিজ্যিক বাধা হ্ৰাস, বিনিয়োগ বৃদ্ধি আৰু অৰ্থনৈতিক সহযোগিতা অধিক শক্তিশালী কৰাৰ ওপৰত গুৰুত্ব দিয়া হ’ব।
দুয়োখন দেশৰ প্ৰধানমন্ত্ৰীয়ে ভাৰত–নিউজিলেণ্ড মুক্ত বাণিজ্য চুক্তি (FTA) স্বাক্ষৰিত হোৱাক আদৰণি জনাই ইয়াক শীঘ্ৰে কাৰ্যকৰী কৰাৰ ক্ষেত্ৰত একমত প্ৰকাশ কৰে। এই চুক্তিয়ে বাণিজ্যিক বাধা কমোৱাৰ লগতে নিউজিলেণ্ডৰ পৰা ভাৰতলৈ বিনিয়োগ বৃদ্ধিত সহায় কৰিব বুলি আশা প্ৰকাশ কৰা হৈছে।
নিউজিলেণ্ডে ভাৰতৰ ‘বিকশিত ভাৰত ২০৪৭’ লক্ষ্য পূৰণত পূৰ্ণ সহযোগিতা আগবঢ়োৱাৰ আশ্বাস দিছে। ইয়াৰ অন্তৰ্গত বাণিজ্য, কৃষি, দক্ষতা বিকাশ, উদ্ভাৱন, স্বচ্ছ শক্তি, ক্ৰীড়া আৰু অন্যান্য বহু ক্ষেত্ৰত যৌথভাৱে কাম কৰা হ’ব।
দুয়োখন দেশে ২০২৫ অথৰাইজড ইকনমিক অপাৰেটৰ্ছ মিউচুৱেল ৰিকগনিশ্বন এৰেঞ্জমেণ্ট (AEO-MRA) কাৰ্যকৰী কৰাৰ সিদ্ধান্ত লৈছে। এই ব্যৱস্থাই বিশ্বাসযোগ্য ব্যৱসায়ীসকলৰ বাবে কাষ্টমছ প্ৰক্ৰিয়া অধিক সহজ আৰু দ্ৰুত কৰি তুলিব।
ভাৰত আৰু নিউজিলেণ্ডে পৰ্যটন সহযোগিতা বৃদ্ধিৰ বাবে এক মেম’ৰেণ্ডাম অৱ এৰেঞ্জমেণ্ট (MoA) স্বাক্ষৰ কৰিছে। লগতে দুয়োখন দেশৰ মাজত প্ৰত্যক্ষ নন-ষ্টপ বিমান সেৱা আৰম্ভ কৰাৰ বাবে বিমান সংস্থাসমূহক উদ্যোগ ল’বলৈ আহ্বান জনোৱা হৈছে।
দুয়োখন দেশে বাগিচা কৃষি, বন, পশুপালন আৰু দুগ্ধ উদ্যোগত সহযোগিতা বৃদ্ধি কৰাৰ সিদ্ধান্ত লৈছে। নিউজিলেণ্ডে ভাৰতত কিৱি, আপেল আৰু মৌ উৎপাদন বৃদ্ধি কৰাৰ বাবে প্ৰযুক্তিগত সহযোগিতা আগবঢ়াব। লগতে ভাৰতত ‘কিৱি চেণ্টাৰ অৱ এক্সেলেন্স’ স্থাপন আৰু পশুপালন–দুগ্ধ খণ্ডত সহযোগিতাৰ বাবে বুজাবুজিৰ চুক্তিতো (MoC) একমত হৈছে।
ভাৰতৰ ডাইৰেক্টৰেট জেনেৰেল অৱ শ্বিপিং আৰু মেৰিটাইম নিউজিলেণ্ড-ৰ মাজত নাবিকসকলৰ দক্ষতাৰ প্ৰমাণপত্ৰৰ পাৰস্পৰিক স্বীকৃতি শক্তিশালী কৰাৰ বাবে আলোচনা অব্যাহত ৰাখিবলৈও দুয়োখন দেশ একমত হৈছে। ইয়াৰ ফলত নাবিকসকলৰ আন্তঃৰাষ্ট্ৰীয় চলাচল সহজ হোৱাৰ লগতে সামুদ্ৰিক খণ্ডত সহযোগিতা অধিক সুদৃঢ় হ’ব বুলি আশা কৰা হৈছে।
ডিজিটেল ডেস্ক, ১১ জুলাই