শিক্ষা আৰু সমাজৰ প্ৰতি গভীৰ দায়বদ্ধতাৰ এক অনন্য নিদৰ্শন দাঙি ধৰি গুৱাহাটীৰ এটা অৱসৰপ্ৰাপ্ত অধ্যাপক দম্পতীয়ে নিজৰ জীৱনজোৰা সঞ্চয় বিশ্ববিদ্যালয়লৈ দান কৰিছে।
ড° পান্নালাল গোস্বামী আৰু ড° নন্দিতা ভট্টাচাৰ্য গোস্বামীয়ে নলবাৰীত অৱস্থিত কুমাৰ ভাস্কৰ বৰ্মা সংস্কৃত আৰু প্ৰাচীন অধ্যয়ন বিশ্ববিদ্যালয় (KBVS&ASU)লৈ ১ কোটি টকা দান আগবঢ়াইছে।
শিক্ষাৰ প্ৰতি গভীৰ অনুৰাগেৰে অনুপ্ৰাণিত এই দম্পতীয়ে জনাইছে যে এই ধন বিশ্ববিদ্যালয়খনত প্ৰাচীন ইতিহাস, ঐতিহ্য আৰু সাংস্কৃতিক গৱেষণা আগবঢ়োৱাৰ ক্ষেত্ৰত ব্যৱহাৰ হোৱাটো তেওঁলোকৰ আশা।
ড° পান্নালাল গোস্বামী আৰু ড° নন্দিতা ভট্টাচাৰ্য গোস্বামীৰ শিক্ষা ক্ষেত্ৰত এক দীঘলীয়া আৰু গৌৰৱোজ্জ্বল কৰ্মজীৱন আছে। তেওঁলোক দুয়ো কটন মহাবিদ্যালয় (বৰ্তমান কটন বিশ্ববিদ্যালয়)ত অধ্যাপনা কৰিছিল আৰু ২০০৯ চনত অৱসৰ গ্ৰহণ কৰে।
ড° পান্নালাল গোস্বামীয়ে ৰসায়ন বিজ্ঞান বিভাগৰ অধ্যাপক হিচাপে দায়িত্ব পালন কৰিছিল, আনহাতে ড° নন্দিতা ভট্টাচাৰ্য গোস্বামীয়ে সংস্কৃত বিভাগৰ অধ্যাপিকা হিচাপে সেৱা আগবঢ়াইছিল।
শিক্ষা আৰু গৱেষণাৰ উন্নয়নৰ স্বাৰ্থত নিজৰ জীৱনজোৰা সঞ্চয় দান কৰাৰ এই মহান সিদ্ধান্তই শিক্ষাবিদ মহল, ছাত্ৰ-ছাত্ৰী আৰু সাধাৰণ ৰাইজৰ মাজত ব্যাপক প্ৰশংসা লাভ কৰিছে। সমাজ আৰু শিক্ষাৰ প্ৰতি তেওঁলোকৰ আজীৱন অংগীকাৰৰ এই পদক্ষেপক এক অনুকৰণীয় দৃষ্টান্ত হিচাপে গণ্য কৰা হৈছে।
ডিজিটেল ডেস্ক, ১৮ জুলাই