চতুর্থবাৰৰ বাবে কমনৱেলথ গেমছত দেশৰ হৈ প্রতিনিধিত্ব কৰিবলৈ লণ্ডনৰ প্রশিক্ষণ শিবিৰৰ পৰা স্কটলেণ্ডৰ গ্লাছগোলৈ ৰাওনা হৈছে সৰুপথাৰৰ জীয়ৰী তথা অসম গৌৰৱ লনবল খেলুৱৈ নয়নমণি শহকীয়া৷
উল্লেখ্য যে উক্ত মেগা স্প’ৰ্টছ ইভেণ্টত ভাৰতক প্রতিনিধিত্ব কৰিবলগীয়া অসমৰ ৪গৰাকী খেলুৱৈৰ ভিতৰত দুগৰাকী হৈছে সৰুপথাৰ সম–জিলাৰ৷ এগৰাকী লনবল খেলুৱৈ নয়নমণি শহকীয়া আৰু আনগৰাকী অলিম্পিক পদক জয়ী বক্সাৰ লাভলীনা বৰগোহাঁই৷
উল্লেখ্য যে লণ্ডনৰ মেডেনহেড প্রশিক্ষণ কেন্দ্রত ২ জুলাইৰ পৰা প্রশিক্ষণ গ্রহণ কৰাৰ অন্তত স্কটলেণ্ড অভিমুখে ৰাওনা হৈছে নয়নমণি শহকীয়াসহ ভাৰতীয় লনবল খেলুৱৈৰ দলটো৷ ২৩ জুলাইৰ পৰা আৰম্ভ হ’বলগীয়া কমনৱেলথ গেমছৰ ছিংগলছ আৰু দলীয় শাখাত অংশগ্রহণ কৰিব নয়নমণিয়ে৷
নয়নমণি শহকীয়াই খেলৰ প্রস্তুতি যথেষ্ট ভাল হোৱা আৰু প্রতিখন খেলতে মই মোৰ সর্বস্ব উজাৰি দিম বুলি কোৱাৰ লগতে অসমবাসীৰ পৰা আশীর্বাদ বিচাৰিছে, যাতে ভাল খেল প্রদর্শন কৰিব পাৰে৷
উল্লেখ্য যে ২০২২ চনত বার্মিংহামত অনুষ্ঠিত কমনৱেলথ গেমছত দলীয় শাখাত সোণৰ পদক লাভ কৰি অসমবাসীক গৌৰৱান্বিত কৰিছিল৷
নিয়মীয়া বাতা, বৰপথাৰ, ২১ জুলাই