UPI-এ ভাৰতত ডিজিটেল পেমেণ্টৰ ধৰণ সম্পূৰ্ণৰূপে সলনি কৰি পেলাইছে। এতিয়া ইণ্টাৰনেট নাথাকিলেও UPI-ৰ জৰিয়তে পেমেণ্ট কৰিব পৰা সুবিধা শীঘ্ৰেই আৰম্ভ হ’ব পাৰে। শেহতীয়াকৈ নেচনেল পেমেণ্টছ কৰ্প’ৰেশ্যন অৱ ইণ্ডিয়া (NPCI)-এ জনাইছে যে এনে এক নতুন প্ৰযুক্তিৰ ওপৰত কাম চলি আছে, যাৰ জৰিয়তে ইণ্টাৰনেট সংযোগ নাথাকিলেও দোকান, বিমান আৰু আণ্ডাৰগ্ৰাউণ্ড মেট্ৰ’ত UPI-ৰে পেমেণ্ট কৰিব পৰা যাব। এই সুবিধা আৰম্ভ হ’লে নেটৱৰ্ক বা ইণ্টাৰনেটৰ সমস্যাৰ বাবে পেমেণ্ট বিফল হোৱাৰ আশংকা যথেষ্ট হ্ৰাস পাব।
মিডিয়া প্ৰতিবেদন অনুসৰি, নতুন সুবিধাটো Near Field Communication (NFC) প্ৰযুক্তিৰ ওপৰত আধাৰিত হ’ব। অৰ্থাৎ, QR Code স্কেন কৰাৰ প্ৰয়োজন নাথাকিব। NFC সমৰ্থিত স্মাৰ্টফোনটো POS মেচিনত কেৱল টেপ কৰিলেই পেমেণ্ট সম্পন্ন হ’ব।
আটাইতকৈ উল্লেখযোগ্য বিষয়টো হ’ল এই সময়ত গ্ৰাহকৰ ফোনত বা ব্যৱসায়ীৰ POS মেচিনত ইণ্টাৰনেট সংযোগ থকাৰ প্ৰয়োজন নহ’ব।
আৰম্ভণিতে এই সুবিধাৰ জৰিয়তে একেলগে সৰ্বাধিক ২,০০০ টকা পৰিশোধ কৰিব পৰা যাব। ইয়াৰ বাবে ব্যৱহাৰকাৰীয়ে ইণ্টাৰনেট থকাৰ সময়ত নিজৰ UPI Lite Wallet-ত টকা ল’ড কৰি ৰাখিব লাগিব। পিছত সেই বেলেঞ্চ ব্যৱহাৰ কৰি অফলাইন অৱস্থাতো পেমেণ্ট কৰিব পাৰিব।
ইয়াৰ উপৰি কিছুমান লেনদেনৰ ক্ষেত্ৰত বাৰে বাৰে UPI PIN দিয়াৰো প্ৰয়োজন নহ’ব।
বৰ্তমান বিমান যাত্ৰা বা আণ্ডাৰগ্ৰাউণ্ড মেট্ৰ’ত বহু সময়ত ইণ্টাৰনেট সংযোগ নাথাকে, ফলত ডিজিটেল পেমেণ্ট কৰাটো কঠিন হৈ পৰে। NPCI-ৰ এই নতুন সুবিধা বিশেষকৈ এনে ঠাইৰ বাবেই প্ৰস্তুত কৰা হৈছে, য’ত নেটৱৰ্ক উপলব্ধ নহয়।
ভৱিষ্যতে বিমানত খাদ্য ক্ৰয় কৰা হওক বা মেট্ৰ’ ষ্টেচনত মূল্য পৰিশোধ কৰা হওক—ইণ্টাৰনেট নাথাকিলেও UPI-ৰে সহজে পেমেণ্ট কৰিব পৰা যাব।
অৱশ্যে এই সুবিধা ব্যৱহাৰৰ বাবে কেৱল গ্ৰাহকৰ স্মাৰ্টফোনেই নহয়, ব্যৱসায়ীৰ POS টাৰ্মিনেলসমূহো নতুন ব্যৱস্থাৰ বাবে প্ৰমাণিত (Certified) হ’ব লাগিব। প্ৰতিবেদন অনুসৰি, NPCI-এ অতি সোনকালে এনে POS টাৰ্মিনেলসমূহৰ প্ৰমাণীকৰণ আৰম্ভ কৰিব। ইয়াৰ পিছত বেংক আৰু বিভিন্ন UPI এপ কোম্পানীয়েও নিজ নিজ এপত এই সুবিধা সংযোজন কৰিব।
বৰ্তমান এই সুবিধা উন্নয়নৰ পৰ্যায়ত আছে আৰু সাধাৰণ ব্যৱহাৰকাৰীৰ বাবে এতিয়াও উপলব্ধ নহয়। NPCI-এ ইয়াৰ আনুষ্ঠানিক মুকলিৰ তাৰিখ ঘোষণা কৰা নাই। যদিও বিভিন্ন প্ৰতিবেদন অনুসৰি এই প্ৰযুক্তিৰ ওপৰত দ্ৰুতগতিত কাম চলি আছে আৰু অহা দিনত পৰ্যায়ক্ৰমে ইয়াক আৰম্ভ কৰা হ’ব পাৰে।
এই সুবিধা আৰম্ভ হ’লে UPI আগতকৈও অধিক সহজ আৰু সুবিধাজনক হৈ উঠিব। দুৰ্বল নেটৱৰ্ক, এয়াৰপ্লেইন মোড বা ভ্ৰমণৰ সময়তো ডিজিটেল পেমেণ্ট অনায়াসে কৰিব পৰা যাব।
ডিজিটেল ডেস্ক, ২১ জুলাই