নিয়মীয়া বাৰ্তা, ১৪ জুনঃ ভাৰতীয় ক্রিকেট দলটোৰ তাৰকা খেলুৱৈ লোকেশ ৰাহুল, ৰবীন্দ্র জাদেজা আৰু শ্বেতেশ্বৰ পূজাৰাসহিতে পাঁচগৰাকী খেলুৱৈলৈ জাননী জাৰি কৰিলে ৰাষ্ট্রীয় ড’পিংবিৰোধী এজেঞ্চী, চমুকৈ ‘নাডা’ই৷
খেলুৱৈকেইগৰাকীৰ অৱস্থান ক’ত তাক জানিবলৈ নাডাই জাননী প্রেৰণ কৰে৷ লোকেশ ৰাহুল, ৰবীন্দ্র জাদেজা আৰু পূজাৰাৰ উপৰি নাডাৰ পৰা জাননী লাভ কৰা আন দুগৰাকী খেলুৱৈ হ’ল ভাৰতীয় মহিলা ক্রিকেট দলটোৰ স্মৃতি মান্ধানা আৰু দীপ্তি শর্মা৷ ক্রিকেটাৰ পাঁচগৰাকীয়ে বিগত পাঁচ মাহ ধৰি তেওঁলোকৰ অৱস্থান সন্দর্ভত কোনো ধৰণৰ তথ্য নাডাৰ ওচৰত দাখিল কৰা নাছিল৷
অৱশ্যে ভাৰতীয় ক্রিকেট নিয়ন্ত্রণ ব’র্ডে নাডাৰ পৰা জাননী লাভ কৰা ক্রিকেটাৰকেইগৰাকীয়ে পাছৱর্ডৰ খেলিমেলিৰ বাবে নাডালৈ তেওঁলোকৰ অৱস্থান সন্দর্ভত কোনো তথ্য যোগান ধৰিবলৈ সক্ষম হোৱা নাছিল বুলি সদৰী কৰে৷
মন কৰিবলগীয়া যে বিগত বছৰৰ আগষ্ট মাহৰ পৰা ভাৰতীয় ক্রিকেট নিয়ন্ত্রণ ব’ৰ্ডে নাডাৰ আওতালৈ আহিছিল৷