গুৱাহাটীৰ ১১ ৱার্ডত কঠোৰ লকডাউন, এসপ্তাহত ক’ৰোনাৰ ভয়ানক সংক্রমণ

নিয়মীয়া বাৰ্তা, ২৪ জুনঃ ক’ৰোনা ভাইৰাছৰ হটস্পটত পৰিণত হোৱা গুৱাহাটী মহানগৰীৰ ১১টা ৱার্ডক সামৰি কালি নিশা ৯ বজাৰ পৰা বলৱৎ কৰা হ’ল ১৪ দিনীয়া কঠোৰ লকডাউন৷ মহানগৰীৰ গুৱাহাটী পৌৰ নিগম এলেকাৰ ২, ৩, ৪, ৫, ৬, ৭, ৮, ৯, ১০ (আংশিক), ১৫ আৰু ১৬নং ৱার্ডত কালিৰে পৰা লকডাউন ঘোষণা কৰে কামৰূপ (ম) জিলা উপায়ুক্ত বিশ্বজিৎ পেগুৱে৷ এখন সংবাদ মেল সম্বোধন কৰি উপায়ুক্তগৰাকীয়ে কয় যে গুৱাহাটীত দ্রুত হাৰত ক’ৰোনাৰ সংক্রমণ বৃদ্ধি পাইছে৷ কামৰূপ (ম) জিলাত সামগ্রিকভাৱে ৫ শতাধিক ক’ৰোনা ৰোগী চিনাক্ত হৈছে যদিও ইয়াৰ ভিতৰত সৰুসজাইত ছোৱাব পৰীক্ষা কৰা আৰু বিভিন্ন হোটেলত কোৱাৰেণ্টাইনত থকা লোকো আছে৷

কেৱল মহানগৰীত ক’ৰোনা আক্রান্তৰ সংখ্যা ২৫০ৰ কম নহ’ব৷ ইয়াৰে ১৭০গৰাকী ক’ৰোনা ৰোগীৰ কোনো ট্রেভেল হিষ্ট্রী বা ভ্রমণ বৃত্তান্ত নাই৷ বিশেষকৈ যোৱা এটা সপ্তাহত মহানগৰীত ব্যাপক হাৰত এই ভাইৰাছৰ সংক্রমণৰ ঘটনা পোহৰলৈ আহিছে৷ জিলা প্রশাসনে সংক্রমণৰ ঘটনাসমূহ পর্যবেক্ষণ কৰাৰ পাছত কেতবোৰ নির্দিষ্ট অঞ্চলত আক্রান্তৰ সংখ্যা পোহৰলৈ অহাটো লক্ষ্য কৰা গৈছে৷ যাৰ বাবে কামৰূপ (ম) জিলা প্রশাসনে এই অঞ্চলসমূহত লকডাউন ঘোষণা কৰাৰ প্রস্তাৱ মুখ্য সচিবলৈ প্রেৰণ কৰে৷

মুখ্য সচিবগৰাকীয়ে এই প্রস্তাৱত অনুমোদন জনায়৷ সেই অনুসৰি কালি নিশা ৯ বজাৰ পৰা ১১টা ৱার্ডক সামৰি বলৱৎ কৰা হৈছে লকডাউন৷ উপায়ুক্ত পেগুৱে লগতে কয় যে পূর্বৰ লকডাউনতকৈ এইবাৰৰ লকডাউন অধিক কঠোৰ হ’ব৷ লকডাউন বলৱৎ হোৱা অঞ্চলত অত্যাৱশ্যকীয় কিছু সেৱাৰ বাহিৰে সাধাৰণ লোকৰ আহ–যাহ সম্পূর্ণৰূপে নিষিদ্ধ কৰা হৈছে৷ লকডাউন উলংঘা কৰা লোকসকলৰ বিৰুদ্ধে দুর্যোগ ব্যৱস্থাপনা আইন, ২০০৫ৰ অধীনত আৰক্ষী–প্রশাসনে ব্যৱস্থা গ্রহণ কৰিব৷ আজিৰে পৰা পৰৱর্তী ১৪ দিনলৈ লকডাউন বাহাল থাকিব৷

সংবাদ মেলত উপায়ুক্তগৰাকীয়ে লগতে জানিবলৈ দিয়ে যে গুৱাহাটীৰ প্রতিটো ৱার্ডত ক’ভিড স্ক্রীনিং চেণ্টাৰ স্থাপন কৰা হৈছে৷ দেহত লক্ষণ দেখা দিলে যিকোনো লোকেই এই কেন্দ্রসমূহত নিজৰ ছোৱাব পৰীক্ষা কৰাব পাৰিব৷ কিন্তু ছোৱাব পৰীক্ষা কৰাসকলে পৰীক্ষাৰ ফলাফল নহা পর্যন্ত ৩ বা ৪ দিনৰ বাবে আইছ’লেচনত ৰখাটো বাধ্যতামূলক৷ কোনো লোকে নিজৰ শৰীৰত ক’ৰোনাৰ লক্ষণ অনুভৱ কৰিলে ১০৪ বা ১০৭৭ নম্বৰত যোগাযোগ কৰিলে চৰকাৰ বা প্রশাসনে স্বাস্থ্য পৰীক্ষাৰ ব্যৱস্থা কৰিব৷

আনহাতে, মহানগৰীৰ লকডাউন বলৱৎ নোহোৱা অঞ্চলসমূহতো ৰাইজক সামাজিক ব্যৱধান মানি চলাৰ লগতে বাধ্যতামূলকভাৱে মাস্ক পৰিধান কৰিবলৈ উপায়ুক্তগৰাকীয়ে আহ্বান জনায়৷