নিয়মীয়া বাৰ্তা, ২৪ জুনঃ হোজাইৰ ইছলাম নগৰৰ সমীপৰ টেংৰীপাৰ গাঁৱত আজি পুৱতি নিশা এগৰাকী নৱবিবাহিতাই চিপ লৈ আত্মহত্যা কৰা ঘটনাই অঞ্চলজুৰি তীব্র চাঞ্চল্যৰ সৃষ্টি কৰিছে৷ গাঁওখনৰ ৱাহিদুল আলম নামৰ যুৱকজনে প্রায় ৪ মাহ পূর্বে হোজাই হাৱাইপুৰ অঞ্চলৰ পশ্চিম বে–গাঁৱৰ নুৰুল হকৰ কন্যাক সামাজিক নিয়ম অনুসৰি বিবাহ কৰাইছিল৷ আজি পুৱা প্রায় ৫ বজাত নৱবিবাহিতা ৰুবিনা ইয়াছমিন (১৯)ক স্বামীগৃহৰ ৰান্ধনী ঘৰত চিপ লোৱা অৱস্থাত উক্ত পৰিয়ালৰ লোকে প্রত্যক্ষ কৰাৰ পিছত চৌদিশে হুৱাদুৱা লাগে৷
পিছত হোজাই ৰাজহ চক্র বিষয়া তথা দণ্ডাধীশ মৃদুস্মিতা বৰাৰ নির্দেশ মর্মে নীলবাগান আৰক্ষী পহৰা চকীৰ ভাৰপ্রাপ্ত বিষয়া মুজিবুৰ ৰহমানে মৃতদেহৰ মৰণোত্তৰ পৰীক্ষাৰ ব্যৱস্থা কৰে৷ মহিলাগৰাকীৰ পিতৃ পৰিয়ালৰ লোকৰ অভিযোগ মতে, স্বামী ৱাহিদুল আলমৰ পৰিয়ালৰ লোকে ৰুবিনাক মিলি হত্যা কৰি আত্মহত্যাৰ ৰূপ দিছে৷ মানসিক–শাৰীৰিকভা নৱবিবাহিতাক নির্যাতন কৰা বুলি পিতৃগৃহৰ লোকে অভিযোগ কৰি কয় যে যোৱানিশাও স্বামী–স্ত্রীৰ মাজত কাজিয়া হৈছিল৷ আনহাতে, স্বামীগৃহৰ লোকে মহিলাগৰাকীয়ে আত্মহত্যা কৰা বুলি দাবী কৰিছে৷
মহিলাগৰাকীৰ মূৰত আঘাতৰ চিন থকা বুলি পিতৃগৃহৰ লোকে অভিযোগ কৰিছে৷ মহিলাগৰাকীক স্বামীগৃহৰ লোকে দীর্ঘদিনৰ পৰা অত্যাচাৰ চলাই আছিল বুলি একাংশই অভিযোগ কৰে৷ নীলবাগান আৰক্ষী পহৰা চকীৰ আৰক্ষীয়ে ঘটনাস্থলীত উপস্থিত হৈ মৃতদেহ উদ্ধাৰ কৰাৰ লগতে এই ঘটনাৰ তদন্ত আৰম্ভ কৰিছে৷ আনহাতে, হত্যাত অভিযুক্ত স্বামী ৱাহিদুল আলমসহ দুজনক আটক কৰি আৰক্ষীয়ে পৃথকে পৃথকে জেৰা অব্যাহত ৰাখিছে৷ ইপিনে, মহিলাগৰাকীৰ পিতৃগৃহৰ লোকে নীলবাগান আৰক্ষী পহৰা চকীৰ সন্মুখত সমৱেত হৈ উচিত তদন্তসাপেক্ষে ন্যায় বিচাৰি আৰক্ষী অধীক্ষক অংকুৰ জৈনৰ হস্তক্ষেপ কামনা কৰে৷