ডিচেম্বৰত কোহলি বাহিনীৰ বিৰুদ্ধে খেলিবলৈ উদগ্রীৱ নাথান লিয়ন

নিয়মীয়া বাৰ্তা, ২৫ জুনঃ অষ্ট্রেলিয়াৰ তাৰকা অফ স্পিনাৰ নাথান লিয়নে ভাৰত–অষ্ট্রেলিয়াৰ টেষ্ট শৃংখলাত ঐতিহাসিক এছেজ শৃংখলাৰ সৈতে তুলনা কৰিছে৷ ডিচেম্বৰত ভাৰতৰ বিৰুদ্ধে বহু প্রত্যাশিত টেষ্ট শৃংখলা খেলিবলৈ আগ্রহেৰে অপেক্ষা কৰি থকা বুলি উল্লেখ কৰি ৩২ বছৰীয়া তাৰকাগৰাকীয়ে কয় যে ভাৰত অত্যন্ত শক্তিশালী দল৷ বেটিঙৰ লগতে বলিঙতো দলটো যথেষ্ট ভাৰসাম্য হৈ উঠিছে৷

তেওঁলোকৰ বিৰুদ্ধে যুঁজ দিয়াটো সকলো সময়তে প্রত্যাহ্বানজনক৷ ‘আগন্তুক ছিজন আমাৰ বাবে ৰোমাঞ্চকৰ হ’ব বুলি আশা কৰিছোঁ৷ ভাৰতৰ দলে শক্তিশালী দলৰ বিৰুদ্ধে টেষ্ট খেলাৰ আমেজেই সুকীয়া৷ এছেজ শৃংখলা আমাৰ বাবে যিদৰে গুৰুত্বপূর্ণ, ঠিক একেদৰে ভাৰতৰ বিৰুদ্ধে টেষ্ট শৃংখলাও অষ্ট্রেলিয়াৰ বাবে একেই গুৰুত্বপূর্ণ৷’ –নাথান লিয়নে এইদৰে কয়৷

মন কৰিবলগীয়া যে অষ্ট্রেলিয়াৰ হৈ ৯৬খন টেষ্ট খেলা অফ স্পিনাৰগৰাকীয়ে এতিয়ালৈকে ৩৯০টা উইকেট দখল কৰিবলৈ সক্ষম হৈছে৷ অৱশ্যে ২০১৮–১৯ত ভাৰতৰ বিৰুদ্ধে টেষ্ট শৃংখলাত বিশেষ সফল হোৱা নাছিল জ্যেষ্ঠ স্পিনাৰগৰাকী৷ উক্ত শৃংখলাটো ভাৰতে ২–১ৰ ব্যৱধানত জয় কৰি ইতিহাস ৰচিবলৈ সক্ষম হৈছিল৷