নিয়মীয়া বাৰ্তা, ২৭ জুনঃ সংবিধানৰ ৩৭০ অনুচ্ছেদৰ বিলুপ্তি ঘটাই মোদী চৰকাৰে জম্মু–কাশ্মীৰৰ বিশেষ ৰাজ্যৰ মর্যাদা কর্তন কৰি উপত্যকা প্রদেশখনক জম্মু–কাশ্মীৰ আৰু লাডাখ হিচাপে দুই কেন্দ্রীয়শাসিত অঞ্চলত বিভক্ত কৰাৰ প্রায় ৮ মাহৰ পাছত নতুন আইনৰ অধীনত উপত্যকাৰ বাসিন্দাসকলক প্রমাণ–পত্র প্রদান কৰিবলৈ লৈছে৷ জম্মু–কাশ্মীৰত থকা স্থায়ী আৰু অস্থায়ী বাসিন্দাসকলক এই নতুন আইনৰ অধীনত প্রমাণ–পত্র প্রদানৰ কাম ইতিমধ্যে আৰম্ভ কৰা হৈছে৷ স্মর্তব্য যে ২০১৯ চনৰ আগষ্ট মাহত সংবিধানৰ ৩৭০ অনুচ্ছেদৰ বিলুপ্তি ঘটাইছিল মোদী চৰকাৰে৷ এই ঘটনাক কেন্দ্র কৰি সমগ্র উপত্যকাত সৃষ্টি হৈছিল উত্তপ্ত পৰিস্থিতি৷ যোৱা মে’ মাহৰ পৰা জম্মু–কাশ্মীৰত বাস কৰি থকা স্থায়ী তথা অস্থায়ী লোকসকলক বাসিন্দাৰ প্রমাণ –পত্র দিয়াৰ কাম আৰম্ভ কৰে প্রশাসনে৷ উপ–ৰাজ্যপাল গিৰীশ চন্দ্র মুর্মুৱে এইক্ষেত্রত অনলাইনযোগে আবেদন–পত্র সংগ্রহৰ ব্যৱস্থা কৰি দিছে বাসিন্দাসকলক৷ বিহাৰৰ আই এ এছ বিষয়া নবীন চৌধাৰী হৈছে জম্মু–কাশ্মীৰৰ বাসিন্দাৰ প্রমাণ–পত্র লাভ কৰা প্রথমগৰাকী আমোলা৷