নিয়মীয়া বাৰ্তা, ২৭ জুনঃ গালৱান উপত্যকাৰ পাছত এইবাৰ ৰঙা চীনৰ নজৰ পৰিছে দাৰবুক–দৌলত বেগ অ’ল্ডি পথৰ ওপৰত৷ যাৰ বাবে অতি তৎপৰতাৰে শেহতীয়াকৈ সমগ্র পথছোৱাত ভাৰতে ব্যাপক হাৰত সেনা মোতায়েন কৰিছে৷ গালৱান উপত্যকা হৈ কাৰাকোৰাম গিৰিপথ পর্যন্ত সংলগ্ণ হৈ থকা এই পথটোৱে লাডাখৰ বিভিন্ন অংশক মূল ভূ–খণ্ডৰ সৈতে সংযুক্ত কৰিছে৷ চীনক চাপত ৰাখিবলৈ ৰণকৌশলগতভাৱে এই পথটো ভাৰতৰ বাবে অতি গুৰুত্বপূর্ণ৷ ইয়াৰ বিপৰীতে আকছাই চীনৰ নিৰাপত্তাৰ ক্ষেত্রত এই পথটোৱে বিপদ সৃষ্টি কৰিব পাৰে বুলি হয়তো বেইজিঙে ধৰি লৈছে৷
সেয়েহে পথটো নিজৰ কব্জাত নিবলৈ চীনে দীর্ঘদিনৰ পৰা পৰিকল্পনা কৰি আহিছে বুলি সামৰিক বিশেষজ্ঞসকলে মত পোষণ কৰিছে৷ সংবাদ প্রতিষ্ঠানৰ বাতৰি অনুসৰি যোৱা বুধবাৰৰ পুৱাৰে পৰাই পথটোৰ কাম বন্ধ কৰাৰ বাবে তৎপৰতা আৰম্ভ কৰে চীনে৷ অকল সেয়াই নহয়, পথটোৰ সমান্তৰালকৈ চীনৰ দিশত নিশাটোৰ ভিতৰতে স্থাপন কৰা হয় পিপ্লছ লিবাৰেচন আর্মী (পি এল এ)ৰ একাধিক ছাউনী৷ যাৰ বাবে ভাৰতো ব্যাপক তৎপৰ হৈ পৰিছে৷ সংবাদ প্রতিষ্ঠানৰ বাতৰিটোত সেনাবাহিনীৰ সূত্রৰ উদ্ধৃতিৰে প্রকাশ পোৱা মতে, ইতিমধ্যে চলিত সপ্তাহতে দুটা পেৰা কমাণ্ডো ইউনিটক কাশ্মীৰৰ পৰা লাডাখলৈ প্রেৰণ কৰাৰ সমান্তৰালভাৱে প্রশিক্ষণপ্রাপ্ত সেনা আৰু কমাণ্ডো বাহিনীকো মোতায়েন কৰা হৈছে৷
ইফালে, লাডাখৰ তিনিটা অঞ্চলত চীনে সৈন্যৰ সংখ্যা শেহতীয়াকৈ হ্রাস কৰিছে যদিও বর্তমান পর্যন্ত তাত ইতিপূর্বে নির্মাণ কৰা শিবিৰসমূহ উঠাই নিয়া নাই৷ গালৱান উপত্যকাৰ সমান্তৰালভাৱে গোগ্রা হট স্প্রিং আৰু পেংগং উপত্যকাৰ সমীপৰ ফিংগাৰ এৰিয়াত পি এল এৰ জোৱানৰ সংখ্যা হ্রাস কৰিছে বুলি ভাৰতীয় সেনাৰ উদ্ধৃতিৰে সংবাদ প্রতিষ্ঠানৰ বাতৰিত প্রকাশ৷ সূত্রটোৱে দাবী কৰা মতে, যোৱা ২২ জুনত দুয়োপক্ষৰ ক’ৰ কমাণ্ডাৰ পর্যায়ৰ বৈঠকৰ পাছতে চীনে সৈন্যৰ সংখ্যা হ্রাস কৰাৰ প্রক্রিয়া আৰম্ভ কৰে৷ বৈঠকত চীনে নির্মাণ কৰা শিবিৰকে ধৰি অন্য আন্তঃগাঁথনিসমূহ ভাঙি পেলোৱাৰ কোনোধৰণৰ সিদ্ধান্ত হোৱা নাছিল৷
সেইবাবে হয়তো চীনে এতিয়াও সীমা উলংঘনেৰে ভাৰত ভূখণ্ডত স্থাপন কৰা শিবিৰসমূহ উঠাই নিয়া নাই৷ ইফালে, যোৱা ১৫ জুনৰ নিশা গালৱান উপত্যকাত সংঘটিত ৰক্তক্ষয়ী সংঘর্ষৰ পাছতে ভাৰত–চীনৰ মাজত বৃদ্ধি পোৱা উত্তেজনাই আন্তর্জাতিক মহলৰো দৃষ্টি আকর্ষণ কৰিছে৷ এছিয়াত চীনৰ যুদ্ধংদেহি মনোভাব পৰিলক্ষিত হোৱাৰ লগে লগে ইউৰোপৰ পৰা বিশ্বৰ অন্য প্রান্তত বিশেষকৈ এছিয়াত বর্ধিত সেনা মোতায়েন প্রক্রিয়া আৰম্ভ কৰিছে আমেৰিকাই৷ ব্রাছেলচত বৃহস্পতিবাৰে অনুষ্ঠিত এক ভিডি’ কনফাৰেঞ্চত খোদ মার্কিন বৈদেশিক সচিব মাইক পম্পে’ই এই কথা সদৰী কৰিছে৷ চীনে যিদৰে ভাৰত, মালয়েছিয়া, ইণ্ডোনেছিয়া, ফিলিপাইনছৰ নিৰাপত্তাৰ ক্ষেত্রত বিপজ্জনক হৈ পৰিছে, তাৰ পৰিপ্রেক্ষিতত পি এল এক যথাযথভাৱে প্রতিহত কৰাৰ বাবেই এইধৰণৰ ব্যৱস্থা গ্রহণ কৰা বুলি সদৰী কৰে মার্কিন বৈদেশিক সচিবজনে৷
এই সন্দর্ভত মাইক পম্পে’ই কয়– ‘পি এল এক মোকাবিলা কৰিবলৈ আমি সর্বদিশৰ পৰা প্রস্তুত হয় নে নহয়, সেইটো নিশ্চিত বিচাৰিছোঁ৷ সম্প্রতি আমাৰ সন্মুখত এয়া এক বিৰাট প্রত্যাহ্বান৷ কিন্তু এই কথা নিশ্চিত যে পি এল এৰ মোকাবিলা কৰিবলৈ পর্যাপ্ত ব্যৱস্থা গ্রহণ কৰাৰ ক্ষেত্রত আমাৰ কোনো অসুবিধা নহয়।