বাঘজান কাণ্ডত মৃত্যু হোৱা অইল কৰ্মচাৰী তীখেশ্বৰ গোহাঁইৰ পুত্ৰ আৰু দূৰ্লভ গগৈৰ পত্নীলৈ কোম্পানীৰ নিযুক্তি পত্ৰ
নিয়মীয়া বাৰ্তা, ৭ জুলাই: যোৱা ২৭ মে’ দিনা সংঘটিত বাঘজান কাণ্ডত অকালতে মৃত্যুক সাৱটি লোৱা অগ্নিনিৰ্বাপক বাহিনীৰ কৰ্মচাৰী তীখেশ্বৰ গোহাঁইৰ বৰপুত্ৰ প্ৰণৱজ্যোতি গোহাঁই আৰু দূৰ্লভ গগৈৰ পত্নী পূৰবী গগৈক কোম্পানীৰ চাকৰি নিযুক্তি পত্ৰ প্ৰদান কৰিলে অইল ইণ্ডিয়াই ।
দূৰ্ভগীয়া পৰিয়াল দুটাৰ ভৱিষ্যত সুৰক্ষাৰ অৰ্থে পূৰ্বৰ প্ৰতিশ্ৰুতি অনুসৰি অইল ইণ্ডিয়াৰ চি এম ডিয়ে সময়োচিত গ্ৰহণ কৰা তাৎক্ষণিক পদক্ষেপত সন্তুষ্টি ব্যক্ত কৰিছে শ্ৰমিকৰ স্বীকৃতিপ্ৰাপ্ত সংগঠন আই অ’ ডব্লিউ ইউৱে । অইলৰ কৰ্মচাৰী সম্পৰ্কৰক্ষী বিভাগত দিল্লীস্হ মানৱ সম্পদ বিভাগৰ কাৰ্য্যবাহী সঞ্চালক অশোক দাস, দুলীয়াজানৰ কাৰ্য্যবাহী সঞ্চালক প্ৰশান্ত বৰকাকতী আৰু মানৱ সম্পদ বিভাগৰ মুখ্য মহাপ্ৰৱন্ধক ৰাজীৱ বৰুৱাই প্ৰণৱজ্যোতি গোহাঁই আৰু পূৰবী গগৈৰ হাতত আনুষ্ঠানিকভাৱে প্ৰদান কৰে চাকৰিৰ নিযুক্তি পত্ৰ। উপস্থিত থাকে অইল ইণ্ডিয়াৰ স্বীকৃতি প্ৰাপ্ত সংগঠন ইণ্ডিয়ান অইল ৱৰ্কাছ ইউনিয়ন চমুকৈ আই অ’ ডব্লিউ ইউৰ সভাপতি ৰাজীৱ দিহিংগীয়া আৰু ভাস্কৰজ্যোতি বৰা ।
উল্লেখ্য যে যোৱা বৰ্ষত তেজপুৰ কাৰিকৰী উদ্যোগিক প্ৰতিষ্ঠানৰ পৰা শিক্ষা সমাপ্ত কৰিছিল প্ৰণৱজ্যোতিয়ে । বৰ্তমান ফিল্ড ইঞ্জিনীয়াৰিং বিভাগত নিযুক্তি লাভ কৰিছে প্ৰয়াত তীখেশ্বৰ গোহাঁইৰ বৰপুত্ৰই । সেইদৰে প্ৰয়াত দূৰ্লভ গগৈৰ পত্নীয়ে কৰ্মচাৰী সম্পৰ্কৰক্ষী বিভাগত নিযুক্তি লাভ কৰে । অইল ইণ্ডিয়া লিমিটেডৰ এই দায়বদ্ধতাৰ প্ৰতি কৃতজ্ঞতা প্ৰকাশ কৰিছে প্ৰয়াত তীখেশ্বৰ গোহাঁই আৰু দূৰ্লভ গগৈৰ পৰিয়ালবৰ্গই ।