নিয়মীয়া বাৰ্তা, ১৮ জুলাইঃ গোলাঘাটত স্বাস্থ্যমন্ত্রী ড০ হিমন্ত বিশ্ব শর্মা উপস্থিত হৈ জিলাখনত শেহতীয়া ক’ভিড সংক্রমণৰ বিষয়ে জিলা প্রশাসনৰ সৈতে আলোচনাত মিলিত হয়৷ উক্ত আলোচনাত সহযোগ কৰে ৰাজ্যসভাৰ সাংসদ কামাখ্যাপ্রসাদ তাছা আৰু মন্ত্রী অতুল বৰাই৷
উল্লেখ্য যে গোলাঘাটত ভ্রমণ বৃত্তান্ত নথকা ১০০জন লোক ক’ৰোনাত আক্রান্ত হৈছে৷ শেহতীয়াকৈ কেন্দ্রীয় চৰকাৰে ৰাজ্যখনত আগষ্ট মাহৰ ভিতৰত ক’ৰোনা আক্রান্তৰ সংখ্যা অধিক বৃদ্ধি পোৱাৰ সম্ভাৱনা ব্যক্ত কৰিছে৷ স্বাস্থ্যমন্ত্রী ড০ শর্মাই এই বিষয়টো উল্লেখ কৰি কয় যে ভাৰত চৰকাৰৰ তথ্য অনুসৰি ১৫ আগষ্টৰ ভিতৰত গোলাঘাটত আঢ়ৈ হাজাৰ লোক ক’ৰোনাত আক্রান্ত হ’ব৷ বর্তমান জিলাখনৰ পৰিস্থিতি যথেষ্ট জটিল হৈছে৷ ক’ৰোনা আক্রান্ত ৰোগীসকলৰ শৰীৰত অক্সিজেনৰ পৰিমাণ কমি যোৱা পৰিলক্ষিত হৈছে৷ এইসকল লোকৰ চিকিৎসা আৰু ৰেপিড টেষ্টৰ চিন্তা কৰা হৈছে৷
গোলাঘাট নগৰৰ জনসংখ্যা ৪০ হাজাৰ৷ গতিকে ৪ হাজাৰ লোকৰ ৰেপিড টেষ্ট সম্পন্ন কৰিলে গোলাঘাটক গণ সংক্রমণৰ পৰা ৰোধ কৰিব পৰা যাব৷ এই লক্ষ্যৰে জিলা উপায়ুক্তক ৰেপিয এণ্টিজেন টেষ্ট আৰম্ভ কৰাৰ নির্দেশ দিয়া হৈছে৷ মন্ত্রী ড০ শর্মাই ইয়াকো কয়– দেশৰ ভিতৰতে অসমত মৃত্যুৰ সংখ্যা কম৷ বর্তমান গোলাঘাটত ১১জন চিকিৎসক কম হৈ আছে৷ গোলাঘাটৰ ব্যক্তিগত নার্ছিং হোমসমূহৰ স্বাস্থ্যকর্মীসকলৰ ক’ভিড টেষ্ট কৰাৰ বাবেও নির্দেশ দিয়া হৈছে৷ ইফালে, ক’ৰোনাৰ পৰিৱেশে ৰাজ্যত আর্থিক ক্ষতি কৰা বুলি উল্লেখ কৰি তেওঁ কয়– ক’ভিডৰ চিকিৎসাৰ বাবে হোৱা ক্ষতিৰ কাৰণে বিত্তমন্ত্রী হিচাপে আঁচনি ৰূপায়ণত অসুবিধাৰ সন্মুখীন হৈছে৷ অৱশ্যে আগষ্ট মাহৰ ভিতৰত টেট শিক্ষকৰ নিযুক্তি সম্পূর্ণ কৰা হ’ব৷ বিদ্যালয়সমূহত পাঠদান আৰম্ভ হোৱাৰ পূর্বেই টেট শিক্ষকক নিযুক্তি দিয়া হ’ব৷