নিয়মীয়া বাৰ্তা ২৩ জুলাইঃ মই ড’নাল্ড ট্রাম্প নহয়৷ মোৰ চকুৰ সন্মুখত মোৰ জনতাই ভুগি থকাটো চাব নোৱাৰোঁ৷– এই মন্তব্য মহাৰাষ্ট্রৰ মুখ্যমন্ত্রী উদ্ধৱ থাকৰেৰ৷ দেশৰ ভিতৰত সর্বাধিক আক্রান্ত আৰু মৃতকৰ তালিকাত শীর্ষস্থানত থকা মহাৰাষ্ট্রত ক’ভিড–১৯ক লৈ চৰকাৰখনে গ্রহণ কৰা ভূমিকা সন্দর্ভত মুখ্যমন্ত্রীগৰাকীয়ে দলৰ মুখপত্র ছামনাত দিয়া সাক্ষাৎকাৰত এই মন্তব্য কৰে৷ শিৱসেনা তথা তেওঁৰে দলৰ জ্যেষ্ঠ নেতা সাংসদ সঞ্জয় ৰাউটে সোধা প্রশ্ণৰ উত্তৰত মুখ্যমন্ত্রীগৰাকীয়ে লকডাউন একেবাৰে শিথিল কৰি দি ৰাজ্যৰ জনতাক বিপদলৈ ঠেলি দিব নোৱাৰে বুলি মন্তব্য কৰে৷ অর্থাৎ আমেৰিকা যুক্তৰাষ্ট্রৰ ৰাষ্ট্রপতি ড’নাল্ড ট্রাম্পৰ দৰে ভূমিকা ল’ব নোৱাৰে বুলি কয় মুখ্যমন্ত্রীগৰাকীয়ে৷ উল্লেখ্য যে আমেৰিকা যুক্তৰাষ্ট্রৰ ৰাষ্ট্রপতি ড’নাল্ড ট্রাম্পে ক’ভিড–১৯ক লৈ গ্রহণ কৰা পদক্ষেপৰ বাবে দেশখনত ৪০ লাখতকৈ অধিক আক্রান্ত আৰু ডেৰ লাখ লোকৰ মৃত্যু ঘটিছে৷