নিয়মীয়া বাৰ্তা, ৩ ছেপ্টেম্বৰঃ তিনিচুকীয়া জিলাৰ মাৰ্ঘেৰিটা মহকুমাৰ বিভিন্ন অঞ্চলত জীৱননাশক মাৰাত্মক ড্ৰাগছৰ ৰমৰমীয়া বেহা অব্যাহত থকাৰ অভিযোগ উত্থাপিত হৈ অহাৰ সময়তে উলুপৰ এজন কুখ্যাত ড্ৰাগছ মাফিয়াক ৰাইজে কৰায়ত্ত কৰি আৰক্ষীক গতাই দি ৰাইজে ইয়াৰ সত্যতা প্ৰতিপন্ন কৰিলে। অঞ্চলটোৰ ৰাইজে উক্ত অঞ্চলত ড্ৰাগছৰ ৰমৰমীয়া বেহা চলি থকাৰ অভিযোগ মাৰ্ঘেৰিটা আৰু পেঙেৰী আৰক্ষীক বহুবাৰ জনোৱাৰ পাছতো কোনো ধৰণৰ ব্যৱস্থা নোলোৱাত গাঁৱৰ ৰাইজ ওলাই আহি ড্ৰাগছবিৰোধী অভিযান চলায় আৰু কেইবাজনো লোকক ড্ৰাগছ খাই থকা অৱস্থাত হাতে-লোটে পাই ভৱিষ্যতে দুনাই নোখোৱাৰ প্ৰতিশ্ৰুতি প্ৰদান কৰাত কৰায়ত্ত কৰা লোককেইজনক ৰাইজে এৰি দিয়ে।
ইপিনে যোৱা বুধবাৰে ড্ৰাগছৰ বেহা চলোৱাৰ অভিযোগত উলুপৰ বাসিন্দা খামচেং বৰুৱা ওৰফে ভাইক ৰাইজে আটক কৰি মাৰ্ঘেৰিটা আৰক্ষী থানাত গতাই দিয়ে। অতি কৌশলেৰে উলুপৰ ৰাইজ আৰু মাৰ্ঘেৰিটা আঞ্চলিক ছাত্ৰ সন্থাই গ্ৰাহকৰ ৰূপত ভাইক ফোন কৰি মাৰ্ঘেৰিটাৰ চেগুনবাৰীত লগ কৰি ড্ৰাগছ দিবলৈ কোৱাত ভাইয়ে বিলাসী বাহনত আহি দিবলৈ লওঁতেই গ্ৰাহক ৰূপী ৰাইজৰ কৱলত পৰে কুখ্যাত ড্ৰাগছ বেপাৰী ভাই।
আটাছুৰ আঞ্চলিক সমিতিৰ সম্পাদকৰ দায়িত্বত থকা ভাইক ড্ৰাগছ বেপাৰৰ লগত জড়িত থকাৰ অভিযোগত চলিত বৰ্ষৰ জানুৱাৰী মাহত ইতিমধ্যে আটাছুৰ পৰা বহিষ্কাৰ কৰা বুলিও জানিব পৰা গৈছে। পেঙেৰী থানাৰ অন্তৰ্গত কঠালগুৰি অঞ্চলৰ এগৰাকী আশা কৰ্মীয়ে ভাইক ড্ৰাগছ যোগান ধৰাৰ অভিযোগ উঠাৰ লগতে মাৰ্ঘেৰিটা থানাৰ অন্তৰ্গত বৰগোলাইৰ জনৈক ফুকন নামৰ এজনেও ভাইক ড্ৰাগছ যোগান ধৰাৰ অভিযোগ উঠিছে।
উল্লেখ্য যে টেকেৰীৰ জনৈক অতুল গগৈ নামৰ এজন লোকেও ভাইক ড্ৰাগছ যোগান ধৰা বুলি অঞ্চলটোত চৰ্চিত হৈছে। প্ৰায় ৫৭ গ্ৰাম ড্ৰাগছসহ ৬০হাজাৰ টকাৰ সৈতে মাৰ্ঘেৰিটা আৰক্ষীয়ে আটক কৰা ভাইৰ বিৰুদ্ধে মাৰ্ঘেৰিটা থানাত এক গোচৰ ৰুজু কৰি আজি জেল হাজোতলৈ প্ৰেৰণ কৰিছে।