নিয়মীয়া বাৰ্তা, ৬ ছেপ্টেম্বৰঃ বলীউড অভিনেতা সুশান্ত সিং ৰাজপুতৰ ৰহস্যজনক মৃত্যুৰ তদন্তত নিত্য নতুন তথ্য পোহৰলৈ আহিছে৷ তদন্তত অভিনেতা সুশান্তৰ বহু বিতর্কিত গার্লফ্রেণ্ড ৰিয়া চক্রৱর্তী এই গোচৰত ক্রমান্বয়ে সাঙোৰ খোৱাৰ দিশত৷ অভিনেতা সুশান্তৰ মৃত্যুৰ লগত ড্রাগছ জড়িত হৈ পৰাৰ পাছতেই নার্ক’টিকছ কণ্ড্র’ল ব্যুৰ’ৱে (এনচিবি)তদন্ত ক্ষিপ্রতৰ কৰি তুলি কালি নিশা অভিনেতা সুশান্তৰ গার্লফ্রেণ্ড ৰিয়া চক্রৱর্তীৰ ভাতৃ সৌৱিক চক্রৱর্তী আৰু হাউছ মেনেজাৰ ছেমুৱেল মিৰান্দাক গ্রেপ্তাৰ কৰাৰ পাছত শীঘ্রে ৰিয়া চক্রৱর্তীৰ বিৰুদ্ধে পদক্ষেপ ল’ব এনচিবিয়ে৷ সৌবিক আৰু মিৰান্দাক আদালতে ৪ দিনৰ এনচিবিৰ জিম্মাত প্রেৰণ কৰিছে৷
এনচিবিয়ে প্রকাশ কৰা মতে, ৰিয়া চক্রৱর্তী ড্রাগছ ব্যৱসায়ৰ সৈতে ওতপ্রোতভাৱে জড়িত৷ ৰিয়াই ড্রাগছ ক্রয় কৰাৰ লগতে বিক্রীও কৰি আহিছে৷ তদুপৰি ৰিয়াই নিজেও ড্রাগছ সেৱন কৰে৷ যোৱা ১৪ জুনত মুম্বাইৰ বান্দাস্থিত বাসগৃহত অভিনেতা সুশান্ত সিং ৰাজপুতৰ মৃতদেহ ওলমি থকা অৱস্থাত উদ্ধাৰ হোৱাৰ পাছতেই অভিনেতাজনৰ মৃত্যু ৰহস্যজনক বুলি চর্চিত হয়৷ এই ৰহস্যজনক মৃত্যুত বিভিন্ন দৃষ্টিকোণেৰে সাঙোৰ খাই পৰে গার্লফ্রেণ্ড ৰিয়া চক্রৱর্তী৷ তদন্তক লৈ মুম্বাই আৰক্ষী আৰু বিহাৰ আৰক্ষীৰ মাজত সংঘাত হোৱাত দুমাহৰ মূৰকত উচ্চতম ন্যায়ালয়ে এই মৃত্যুৰ তদন্ত চিবিআইৰ হাতত অর্পণ কৰে৷ চিবিআইৰ বিশেষ অনুসন্ধান দলে অভিনেতা সুশান্তৰ গোচৰটোৰ তদন্ত কৰাৰ পাছতেই ঘটনাটোত ড্রাগছ জড়িত হোৱাটো স্পষ্ট হৈ পৰে আৰু এনচিবিয়ে তদন্ত অব্যাহত ৰাখে৷ মুম্বাইৰ কুখ্যাত তিনি ড্রাগছ মাফিয়াক আটক কৰাৰ পাছতেই সুশান্ত গোচৰৰ লগত ড্রাগছৰ সম্পর্ক প্রমাণিত হয় আৰু এনচিবিয়ে সৌৱিক–মিৰান্দাক গ্রেপ্তাৰ কৰে৷ ৰিয়া চক্রৱর্তীৰ বাসগৃহতো তালাচী চলায়৷
ইপিনে, গোচৰৰ তদন্ত চলাই থকা চিবিআয়ে অভিনেতাজনৰ বাসগৃহলৈ নিয়ে এইমছৰ তিনিগৰাকী চিকিৎসকৰ বিশেষ দল এটা৷ এই চিকিৎসকৰ দলটোৱে অভিনেতাগৰাকীৰ বাসগৃহত ফৰেনছিক পৰীক্ষা চলাব৷ চিবিআয়ে প্রেৰণ কৰা এই চিকিৎসকৰ দলটোৱে প্রতিবেদন দাখিল কৰিব তদন্তকাৰী সংস্থাটোক৷ বাসগৃহত এইমছৰ চিকিৎসকৰ দলটো উপস্থিত থকাৰ সময়ত অভিনেতা সুশান্ত সিঙৰ ভগ্ণী মিটু সিং, অভিনেতাজনৰ সহায়ক নিৰজ আৰু কেশৱো থাকে৷ বাসগৃহত পৰীক্ষা চলোৱা এইমছৰ ফৰেনছিক মেডিচিনৰ মুৰব্বী ডাঃ সুধীৰ গুপ্তাই কয় যে ঘটনাটোক হত্যাকাণ্ডৰ দৃষ্টিকোণেৰে পৰীক্ষা কৰাটোৱে তেওঁলোকৰ বাবে গুৰুত্বপূর্ণ৷ হত্যাৰ সম্ভাৱনা সকলো তেওঁলোকে পৰীক্ষা চলাব৷ মন কৰিবলগীয়া যে চিবিআই–এনচিবিৰ লগতে ইডিয়েও এই ঘটনাৰ তদন্তত চামিল হৈ আছে৷ শেহতীয়া তথ্য মতে, অভিনেতা সুশান্তৰ ঘৰুৱা সহায়ক দীপেশ সাৱন্তক নিশা এন চি বিয়ে গ্রেপ্তাৰ কৰিছে৷