নিয়মীয়া বাৰ্তা, ৬ ছেপ্টেম্বৰঃ ইউএইত অহা ১৯ ছেপ্ঢেম্বৰৰ পৰা আৰম্ভ হ’বলগীয়া ত্রয়োদশ সংস্কৰণৰ আইপিএলৰ আনুষ্ঠানিক সূচী দেওবাৰে ঘোষণা কৰা হ’ব৷ আইপিএলৰ অধ্যক্ষ ব্রিজেশ পেটেলে আজি এই কথা জানিবলৈ দিয়ে৷ বিচিচিআইৰ ঐশ্বর্যশালী টি–২০ লীগখনলৈ মাজত মাথোঁ কেইটামান দিন বাকী থকা অৱস্থাতো আনুষ্ঠানিক সূচী ঘোষণা নোহোৱাত অধিকাংশ ফ্রেন্সাইজীয়ে মুকলিকৈ ক্ষোভ প্রকাশ কৰিছিল৷
ব’ডক শীঘ্রে আইপিএলৰ সূচী ঘোষণা কৰিবলৈ তেওঁলোকে দাবী উত্থাপন কৰা দেখা গৈছিল৷ ফেন্সাইজীসমূহে সংবাদ মাধ্যমৰ আগত ক্ষোভ উজাৰিছিল যে আইপিএলৰ সম্পূর্ণ সূচী ঘোষণা নোহোৱাৰ বাবে তেওঁলোকে পৰিকল্পনা তৈয়াৰ কৰাত অসুবিধাৰ সন্মুখীন হৈছে৷ উল্লেখ্য যে বহু প্রত্যাশিত আইপিএলৰ বাবে প্রতিটো দলৰ খেলুৱৈসকল প্রায় এপষেক পূর্বেই ডুবাই আৰু আবুধাবিত উপস্থিত হৈছে৷
ইতিমধ্যে প্রতিটো দলে আইপিএলৰ মহাৰণৰ বাবে প্রস্তুতি আৰম্ভ কৰিছে৷ মহামাৰী ক’ভিড–১৯–এ আতংকৰ সৃষ্টি কৰা চেন্নাই ছুপাৰ কিংছৰ খেলুৱৈসকলেও কালিৰে পৰা ডুবাইত অনুশীলন আৰম্ভ কৰা দেখা গৈছে৷ মন কৰিবলগীয়া যে যোৱা সপ্তাহত বিচিচিআয়ে আনুষ্ঠানিকভাৱে ঘোষণা কৰিছিল যে আইপিএলৰ বাবে ডুবাইত উপস্থিত হোৱা মুঠ ১৩গৰাকী সদস্যৰ শৰীৰত ক’ভিড–১৯ৰ উপস্থিতি ধৰা পৰিছে৷