নিয়মীয়া বার্তা, ১২ ছেপ্টেম্বৰঃ কামৰূপ (ম) জিলাৰ উপায়ুক্তৰ পাণবজাৰৰ পুৰণি বাংলোৰ পিছফালে থকা গুৱাহাটী জলব’ডৰ পানী উত্তোলন কেন্দ্রত কর্মৰত বলভদ্র দেৱ (৫০) নামৰ কর্মচাৰীজন ব্রহ্মপুত্রত পিছলি পৰি সন্ধানহীন হোৱা ঘটনাই তীব্র চাঞ্চল্যৰ সৃষ্টি কৰিছে৷ কর্মচাৰীজনে এজন সহকর্মীৰ সৈতে পানী উত্তোলন কেন্দ্রত কর্মৰত হৈ আছিল৷ কর্মচাৰীজনে পাৰলৈ উঠি আহিবলৈ ধৰাৰ সময়তে হঠাৎ পিছলি পৰি ব্রহ্মপুত্রত সন্ধানহীন হয়৷ ইয়াৰ পিছতে সহকর্মীজনে ঊর্ধ্বতন কর্তৃপক্ষক ঘটনাৰ বিষয়ে অৱগত কৰায়৷ ঘটনাস্থলীত নদী আৰক্ষী, এছ ডি আৰ এফ আৰু এন ডি আৰ এফৰ দল উপস্থিত হৈ বলভদ্র দেৱৰ সন্ধানত অভিযান চলায়৷ কিন্তু কর্মচাৰীজনৰ সন্ধান উলিয়াবলৈ সক্ষম নহ’ল৷