জয়েৰে আৰম্ভণি ৰয়েল চেলেঞ্জার্ছৰ

নিয়মীয়া বাৰ্তা ২২ ছেপ্টেম্বৰঃ  বিৰাট কোহলি নেতৃত্বাধীন ৰয়েল চেলেঞ্জার্ছ বাংগালুৰুৱে চলিত আই পি এলত জয়েৰে অভিযান আৰম্ভ কৰিছে৷ ডুবাইত আজি অনুষ্ঠিত এখন মেচত দলটোৱে ছানৰাইজার্ছ হায়দৰাবাদক ১০ ৰানত পৰাস্ত কৰে৷ ১৬৪ ৰানৰ লক্ষ্যৰ পিছ লৈ ছানৰাইজার্ছে ১৯.৪ অ’ভাৰত ১৫৩ ৰানত আটাইকেইটা উইকেট হেৰুৱায়৷ দলটোৰ হৈ অ’পেনাৰ জ’নী বেয়াৰষ্ট’ই ৬১ আৰু মনীষ পাণ্ডেই ৩৪ ৰান কৰাৰ বাহিৰে আনকেইগৰাকী বেটছমেন সম্পূর্ণৰূপে ব্যর্থ হয়৷ ৰয়েল চেলেঞ্জার্ছ বাংগালুৰুৰ হৈ তাৰকা স্পিনাৰ য়ুজবেন্দ্র ছাহালে তিনিটা, বেগী বলাৰ নৱদীপ ছাইনী আৰু শিৱম ডুবেই দুটাকৈ উইকেট পায়৷ ইয়াৰ পূর্বে ছানৰাইজার্ছ হায়দৰাবাদৰ আমন্ত্রণক্রমে ইনিংছ মুকলি কৰি ৰয়েল চেলেঞ্জার্ছ বাংগালুৰুৱে নির্ধাৰিত ২০ অ’ভাৰত ৫ উইকেট হেৰুৱাই ১৬৩ ৰান সংগ্রহ কৰে৷ অষ্ট্রেলিয়াৰ তাৰকা বেটছমেন আৰন ফিনছ আৰু কর্ণাটকৰ উদীয়মান অ’পেনাৰ দেৱদূত পাড়িকালে প্রথম উইকেটত ৯০ ৰান যোগ দি দলটোক সুন্দৰ আৰম্ভণি দিবলৈ সক্ষম হয়৷ কিন্তু দলটোৱে কম সময়ৰ ভিতৰতে পাড়িকাল আৰু ফিনছৰ উইকেট হেৰুৱায়৷ আই পি এলত অভিষেক ঘটোৱা বাঁওহতীয়া অ’পেনাৰ পাড়িকালে ৪২ বলৰ সন্মুখীন হৈ আঠটা বাউণ্ডেৰীৰ সহায়ত ৫৬ ৰানৰ বৰঙণি আগবঢ়ায়৷ ফিনছে ২৭ বলত এটা বাউণ্ডেৰী আৰু দুটা অ’ভাৰ বাউণ্ডেৰীৰে ২৯ ৰান কৰে৷ ইয়াৰ পিছতে উইকেটলৈ আহে অধিনায়ক বিৰাট কোহলি আৰু এবি ডি ভিলিয়ার্ছ৷ দুয়োগৰাকীয়ে তৃতীয় উইকেটত ৩৩ ৰান যোগ দিয়াৰ সময়তে কোহলি ব্যক্তিগত ১৪ ৰানত পেভিলিয়নমুখী হয়৷ অৱশ্যে আনটো এণ্ডত ডি ভিলিয়ার্ছে বিস্ফোৰক বেটিঙেৰে আৰ চি বিৰ ইনিংছ আগুৱাই নিয়ে৷ তেওঁ ৩০ বলত চাৰিটা বাউণ্ডেৰী আৰু দুটা অ’ভাৰ বাউণ্ডেৰীৰে ৫১ ৰান সংগ্রহ কৰি অন্তিম অ’ভাৰত দুর্ভাগ্যজনকভাৱে ৰানআউট হয়৷ ছানৰাইজার্ছ হায়দৰাবাদৰ হৈ টি নটৰাজন, বিজয় শংকৰ আৰু অভিষেক শর্মাই এটাকৈ উইকেট দখল কৰে৷ উল্লেখ্য যে বিগত তিনি বছৰৰ মূৰত আৰ চি বিয়ে আই পি এলত আজি জয়েৰে অভিযান আৰম্ভ কৰিছে৷