নিয়মীয়া বাৰ্তা, ১৫ অক্টোবৰঃ সাহিত্যৰথী লক্ষ্মীনাথ বেজবৰুৱাৰ ১৫৬সংখ্যক জন্মদিৱস উপলক্ষে কালি কামৰূপ মহানগৰ জিলা প্রশাসনৰ উদ্যোগত গুৱাহাটী ক্লাবৰ সাহিত্যৰথী লক্ষ্মীনাথ বেজবৰুৱা চ’কত এক অনুষ্ঠানৰ আয়োজন কৰা হয়৷
অনুষ্ঠানত অংশগ্রহণ কৰি কামৰূপ মহানগৰ জিলাৰ উপায়ুক্ত বিশ্বজিৎ পেগুৱে সাহিত্যৰথী বেজবৰুৱাৰ প্রতিমূর্তিৰ সন্মুখত বন্তি প্রজ্বলন আৰু পুষ্পাঞ্জলি অর্পণ কৰি মহান সাহিত্যিকগৰাকীৰ প্রতি গভীৰ শ্রদ্ধা নিবেদন কৰে৷
জিলা উপায়ুক্ত পেগুৱে অসমৰ জাতীয় জীৱনলৈ সাহিত্যৰথী বেজবৰুৱাই আগবঢ়াই যোৱা অতুলনীয় অৱদানৰ বিষয়ে গভীৰ শ্রদ্ধাসহকাৰে স্মৰণ কৰি কয় যে লক্ষ্মীনাথ বেজবৰুৱাৰ জীৱনটো অসমীয়া জাতিৰ কাৰণে সততে অনুপ্রেৰণাৰ উৎস হৈ থাকিব৷ কামৰূপ মহানগৰ জিলাৰ অতিৰিক্ত উপায়ুক্ত বিপুল কুমাৰ দাস, জিলা তথ্য আৰু জনসংযোগ বিষয়া ৰতন সাউদ, নির্বাচনী বিষয়া ঝর্ণা পাটগিৰিকে ধৰি জিলা প্রশাসনৰ কেইবাগৰাকীও বিষয়া–কর্মচাৰী এই অনুষ্ঠানত উপস্থিত আছিল৷
ইফালে বনমন্ত্রী পৰিমল শুক্লবৈদ্যই আজি গুৱাহাটী ক্লাবৰ বেজবৰুৱা চ’কত উপস্থিত হৈ লক্ষ্মীনাথ বেজবৰুৱাৰ প্রতিমূর্তিত বন্তি প্রজ্বলন আৰু মাল্যার্পণেৰে শ্রদ্ধাঞ্জলি জ্ঞাপন কৰে৷