নিয়মীয়া বাৰ্তা, ১৭ অক্টোবৰঃ ছানৰাইজার্ছ হায়দৰাবাদৰ বিৰুদ্ধে শেহতীয়া মেচত চমকপ্রদ জয় সাব্যস্ত কৰি পুনৰ উজ্জীৱিত হৈ উঠা চেন্নাই ছুপাৰ কিংছ আজি দিল্লী কেপিটেলছৰ মুখামুখি হ’ব৷ শ্বাৰজাহ ক্রিকেট গ্রাউণ্ডত অনুষ্ঠিত হ’বলগীয়া গুৰুত্বপূর্ণ মেচখনত মহেন্দ্র সিং ধোনী নেতৃত্বাধীন চেন্নায়ে জয়ৰ ধাৰা অক্ষুণ্ণ ৰাখি চলিত আই পি এলত প্লে’ অফ খেলাৰ আশা সজীৱ কৰি ৰখাৰ লক্ষ্যৰে খেলপথাৰত নামিব৷
অ’পেনাৰ ফাফ ডু প্লেচিছ আৰু শ্বেন ৱাটছনৰ চমকপ্রদ ফর্মে দলটোৰ মনোবল বৃদ্ধি কৰি ৰখাৰ সময়তে শেহতীয়াকৈ ফর্ম উদ্ধাৰ কৰিছে অলৰাউণ্ডাৰ ৰবীন্দ্র জাদেজা আৰু অধিনায়ক ধোনীয়ে৷
অৱশ্যে জাদেজা আৰু ধোনীয়ে আজিৰ মেচত অধিক দীঘলীয়া ইনিংছ খেলাৰ আশা কৰিব চেন্নাই ছুপাৰ কিংছে৷ বলিঙত শার্দূল ঠাকুৰ আৰু দীপক চহৰে অধিনায়ক ধোনীৰ প্রত্যাশা পূৰণ কৰিবলৈ সক্ষম হৈছে৷
ইফালে, শেহতীয়া মেচখনত ৰাজস্থান ৰয়েলছক ১৩ ৰানত পৰাস্ত কৰি আত্মবিশ্বাসী হৈ থকা দিল্লী কেপিটেলছে অধিনায়ক শ্রেয়াছ আয়াৰৰ ফিটনেছক লৈ কিছু চিন্তাত পৰিছে৷ আজি তেওঁৰ অংশগ্রহণ এতিয়াও নিশ্চিত হোৱা নাই৷ উদীয়মান অ’পেনাৰ পৃথ্বি শ্ব আৰু মিডল অর্ডাৰ বেটছমেন আজিংক্য ৰাহানেৰ পৰাও দলে দীঘলীয়া ইনিংছ আশা কৰিছে৷ ধোনী বাহিনীৰ বিৰুদ্ধে দিল্লী কেপিটেলছৰ দুই তাৰকা বেগী বলাৰ কাগিছ’ ৰাবাডা আৰু এনৰিচ নর্টজেৰ প্রদর্শন লক্ষণীয় হ’ব৷
খেলৰ সময়ঃ সন্ধিয়া ৭.৩০ বজা৷