নিয়মীয়া বাৰ্তা, ২৮ অক্টোবৰঃ তিব্বতী ধর্মীয় নেতা দালাই লামাই ৰাষ্ট্রসংঘৰ উদ্যোগত ৫০খন দেশে পৰমাণু অস্ত্রৰ ব্যৱহাৰ নিষিদ্ধ কৰাৰ এক আন্তর্জাতিক চুক্তিত স্বাক্ষৰ কৰা বিষয়টোত ঐতিহাসিক আখ্যা দিছে৷ পৰমাণু অস্ত্র প্রতিৰোধ চুক্তি ৯০ দিনৰ ভিতৰতে কার্যকৰী কৰাৰ সংকল্প লৈছে ৰাষ্ট্রসংঘই৷
দালাই লামাই এক বিবৃতিত গণবিধ্বংসী এই মাৰণাস্ত্রৰ ব্যৱহাৰ নিষিদ্ধ হ’ব লাগে বুলি পূর্বৰে পৰা কৈ আহিছে৷ স্মর্তব্য যে হণ্ডুৰাছে শেহতীয়াকৈ এই চুক্তিক আদৰণি জনাইছে৷ পৰমাণু অস্ত্র প্রতিৰোধ চুক্তি বা টি পি এন ডব্লিউ আগন্তুক বর্ষৰ ২২ জানুৱাৰীৰ পৰা বিশ্বজুৰি কার্যকৰী কৰাৰ সংকল্প লৈছে ৰাষ্ট্রসংঘই৷
অৱশ্যে আমেৰিকাকে ধৰি পৰমাণু শক্তি হিচাপে চিহ্ণিত ৰাষ্ট্রসমূহে এই চুক্তিৰ বিৰোধ কৰিছে৷ কিন্তু বিভিন্ন সামাজিক সংগঠনে ৰাষ্ট্রসংঘৰ এই প্রচেষ্টাক আদৰণি জনাইছে৷ তিব্বতী ধর্মীয় নেতাগৰাকীয়েও গণবিধ্বংসী অস্ত্র নিষিদ্ধৰ প্রচেষ্টাক প্রশংসা কৰিছে৷