নিয়মীয়া বাৰ্তা, ১৫ নবেম্বৰঃ অষ্ট্রেলিয়াৰ বিৰুদ্ধে অহা ১৭ ডিচেম্বৰৰ পৰা আৰম্ভ হ’বলগীয়া বহুপ্রত্যাশিত টেষ্ট শৃংখলালৈ সুস্থ হৈ উঠিব অভিজ্ঞ উইকেটৰক্ষক ঋদ্ধিমান সাহা৷ হেমষ্ট্রিঙৰ আঘাতৰ পৰা ক্রমাৎ সুস্থ হৈ উঠা উইকেটৰক্ষকগৰাকীয়্ টেষ্ট শৃংখলাৰ পূর্বে অষ্ট্রেলিয়ালৈ ৰাওনা হ’ব৷ এই বিশ্বাস প্রকাশ কৰিছে ভাৰতীয় ক্রিকেট নিয়ন্ত্রণ ব’ডৰ মুৰব্বী সৌৰভ গাংগুলীয়ে৷
‘বি চি চি আইৰ ট্রেইনাৰ আৰু ফিজি’ই প্রতিগৰাকী খেলুৱৈৰ আঘাত নিৰীক্ষণ কৰি আছে৷ উইকেটৰক্ষক সাহা দ্রুতগতিৰে সুস্থ হৈ উঠিছে৷ তেওঁ অষ্ট্রেলিয়াৰ বিৰুদ্ধে টেষ্ট শৃংখলাৰ পূর্বে সম্পূর্ণ সুস্থ হৈ উঠিব৷’ গাংগুলীয়ে এইদৰে কয়৷ ইফালে, টীম ইণ্ডিয়াৰ অ’পেনাৰ ৰোহিত শর্মা এতিয়াও ৭০ শতাংশহে সুস্থ বুলিও ব’ডৰ মুৰব্বীগৰাকীয়ে উল্লেখ কৰে৷ হেমষ্ট্রিঙৰ আঘাতৰ পৰা সম্পূর্ণ সুস্থ হৈ নুঠাৰ বাবে ৰোহিতক এদিনীয়া আৰু টি–২০ দলত অন্তর্ভুক্ত কৰা নাই বুলিও তেওঁ জানিবলৈ দিয়ে৷