নিয়মীয়া বাৰ্তা, ২৬ নৱেম্বৰঃ অসমত ক’ভিড সংক্রমণৰ হাৰ নিম্নগামী আৰু সুস্থতাৰ হাৰ আশাব্যঞ্জকভাৱে বৃদ্ধি পাইছে যদিও মৃত্যুৰ ধাৰা এতিয়াও অব্যাহত আছে৷ বুধবাৰৰ দিনটোতো ৰাজ্যখনত দুগৰাকী ক’ভিড ৰোগীৰ মৃত্যু ঘটে৷ ইয়াৰ লগে লগে অসমত ক’ভিডত মৃত্যু হোৱা লোকৰ সংখ্যা ৯৭৮ গৰাকীলৈ বৃদ্ধি পালে৷
স্বাস্থ্যমন্ত্রী ড০ হিমন্ত বিশ্ব শর্মাই টুইটাৰযোগে জনোৱা অনুসৰি বুধবাৰে ডিব্রুগড়ৰ তুলন বৰুৱা (৮৫) আৰু বৰপেটাৰ কামাখ্যা শর্মাৰ (৭৪) মৃত্যু হয়৷ মন্ত্রী ড০ শর্মাই দুয়োগৰাকী লোকৰ বিয়োগত গভীৰ শোক প্রকাশ কৰাৰ লগতে শোকসন্তপ্ত পৰিয়াললৈ সমবেদনা জ্ঞাপন কৰে৷ ইপিনে, বুধবাৰে ৰাজ্যখনৰ নতুনকৈ ১৮২ গৰাকী লোক ক’ভিডত আক্রান্ত হয়৷ ইয়াৰে ৬৪ গৰাকী গুৱাহাটী মহানগৰীৰ৷ আজিৰ দিনটোত ৰাজ্যখনত মুঠ ২৪,৪২৬ গৰাকী লোকৰ নমুনা পৰীক্ষা কৰা হয়৷ দিনটোত আক্রান্তৰ হাৰ ০.৭৫ শতাংশ৷
মন কৰিবলগীয়া এয়ে যে যোৱা মার্চ মাহৰ পৰা এতিয়ালৈ অসমত সর্বমুঠ ২,১২,০২১ গৰাকী লোক ক’ভিডত আক্রান্ত হয়৷ ইয়াৰে ২,০৭,৭৬৩ গৰাকী লোক ইতিমধ্যে সুস্থ হৈ ঘৰলৈ উভতিছে৷ বর্তমান বিভিন্ন হাস্পতালত ৩,২৭৭গৰাকী লোক চিকিৎসাধীন হৈ আছে৷ ৰাজ্যখনত বর্তমান সুস্থতাৰ হাৰ ৯৭.৯৯ শতাংশ, সক্রিয় হৈ থকা ৰোগীৰ হাৰ ১.৫৪ শতাংশ আৰু মৃত্যুৰ হাৰ ০.৪৬ শতাংশ৷