নিয়মীয়া বাৰ্তা, ২৬ নৱেম্বৰঃ বস্ত্রনগৰী শুৱালকুছি ৰাজগড়ৰ শ্রীমন্ত শংকৰদেৱৰ নামঘৰৰ পঞ্চম বার্ষিক প্রতিষ্ঠা দিৱস মঙলবাৰৰে পৰা দুদিনীয়াকৈ কার্যসূচীৰে অনুষ্ঠিত হয়৷ মঙলবাৰে পুৱা ৯ বজাত আই মাতৃৰ নাম–প্রসংগ অনুষ্ঠিত হয়৷ ১০ বজাত নগেন ভৰালীয়ে বন্তি প্রজ্বলন কৰাৰ পিছতে ১০.৩০ বজাত গছপুলি ৰোপণ কৰে ক্রমে প্রশান্ত ভৰালী, অনিল দাস, দুলু দাস আৰু ৰত্ন ৰাজবংশীয়ে৷ সন্ধিয়া অনুষ্ঠিত ভাগৱত শোভাযাত্রাত অগণন ধর্মপ্রাণ লোকে অংশগ্রহণ কৰি হৰিনামৰ ধ্বনিৰে শুৱালকুছিৰ আকাশ–বতাহ মুখৰ কৰি তোলে৷
সম্পূর্ণ অসমীয়া সাজ পৰিধান কৰি ডিঙিত গামোচা লৈ নামত অংশগ্রহণ কৰা পুৰুষ–মহিলা সকলোৱে কীর্তন ঘোষাৰ নাম গাই গাই ৰাজপথেৰে ভাগৱত লৈ শোভাযাত্রা কৰে৷ কালি পুৱা ৮.৩০ বজাত পতাকা উত্তোলন কৰে প্রতিষ্ঠাপক সভাপতি উদিত ভৰালীয়ে৷ প্রতিষ্ঠা দিৱসৰ পতাকা উত্তোলন কৰে দেৱজানী চৌধুৰী, লক্ষী দাস, বিমলা দাস আৰু মিনতি দাসে৷ ১০ বজাত বন্তি প্রজ্বলন কৰে প্রাইড ইষ্ট এণ্টাৰটেইনমেণ্ট প্রাইভেট লিমিটেডৰ চি এম ডি ৰিণিকি ভূঞা শর্মাই৷
বন্তি প্রজ্বলন কৰি ৰিণিকি ভূঞা শর্মাই চমু বক্তব্যত কয় যে এক শৰণ হৰিনাম ধর্মৰ জৰিয়তে মহাপুৰুষ শংকৰদেৱে সমাজত শান্তি প্রতিষ্ঠা কৰাৰ চিন্তা কৰিছিল৷ সত্রৰ ভকত–বৈষ্ণৱৰ জৰিয়তে মহাপুৰুষ জনাই সমাজলৈ শান্তিৰ বার্তা প্রেৰণ কৰিছিল৷ আজিৰ সমাজখনতো যাতে শান্তিৰ বাতাৱৰণ বর্তি থাকে তাৰ বাবে গুৰুজনাৰ আদর্শৰে যুৱ প্রজন্মক অনুপ্রাণিত হ’বলৈ তেওঁ আহ্বান জনায়৷