নিয়মীয়া বাৰ্তা ১৩ ডিচেম্বৰঃ ৰাষ্ট্রীয় ক্রিকেট একাডেমীয়ে আঘাতমুক্ত ঘোষণা কৰিলেও টেষ্ট শৃংখলাৰ পূর্বে পুনৰ ফিটনেছ টেষ্টৰ সন্মুখীন হ’ব লাগিব টীম ইণ্ডিয়াৰ তাৰকা অ’পেনাৰ ৰোহিত শর্মাই৷ ভাৰতীয় ক্রিকেট নিয়ন্ত্রণ ব’র্ডে আজি ক্রিকেটাৰগৰাকীক ক্লিনিকেলী ফিট বুলি ঘোষণা কৰি কয় যে অষ্ট্রেলিয়াত ১৪ দিনৰ বাধ্যতামূলক কোৱাৰেণ্টাইনৰ পিছত ৰোহিতৰ ফিটনেছ টীম ইণ্ডিয়াৰ মেডিকেল টীমে পুনৰ এবাৰ পর্যবেক্ষণ কৰিব৷ ইয়াৰ পিছতে শৃংখলাৰ অন্তিম দুখন টেষ্টত অ’পেনাৰগৰাকীৰ অংশগ্রহণ সন্দর্ভত সিদ্ধান্ত গ্রহণ কৰা হ’ব৷ ‘বাংগালুৰুস্থিত এন চি এত ৰোহিত শর্মাই সুস্থ অৱস্থালৈ উভতি অহাৰ প্রক্রিয়া সম্পূর্ণ কৰে আৰু তেওঁ এতিয়া ক্লিনিকেলী ফিট৷ আই পি এলত হেমষ্ট্রিঙৰ আঘাতৰ সন্মুখীন হোৱাৰ পিছত তেওঁ ১৯ নৱেম্বৰৰ পৰা এন চি এত সুস্থ অৱস্থালৈ উভতি অহাৰ প্রক্রিয়া আৰম্ভ কৰে৷ ৰোহিতৰ শেহতীয়া ফিটনেছক লৈ এন চি এৰ মেডিকেল টীমে সন্তুষ্টি প্রকাশ কৰিছে৷ এতিয়া তেওঁ অষ্ট্রেলিয়ালৈ গৈ ১৪ দিনৰ বাধ্যতামূলক কোৱাৰেণ্টাইনত থাকিব৷ এই সময়ছোৱাত বেটছমেনগৰাকীক ফিটনেছৰ এক বিস্তৃত কার্যসূচী ধার্য কৰি দিয়া হৈছে৷ দুসপ্তাহ পিছত টীম ইণ্ডিয়াৰ মেডিকেল টীমে ৰোহিতৰ স্বাস্থ্যৰ বুজ ল’ব আৰু সেই অনুসৰি টেষ্ট শৃংখলাত তেওঁৰ অংশগ্রহণ সন্দর্ভত সিদ্ধান্ত গ্রহণ কৰিব৷’ বি চি চি আয়ে এক বিবৃতিত এইদৰে কৈছে৷ উল্লেখ্য যে তৃতীয় আৰু চতুর্থ টেষ্টত অংশ লোৱাৰ লক্ষ্যৰে ৰোহিতে সোমবাৰে ছিডনীলৈ উৰা মাৰিব৷