নিয়মীয়া বাৰ্তা, ১৬ ডিচেম্বৰঃ তিৱা স্বায়ওশাসিত পৰিষদৰ নির্বাচনৰ দিন মাজত মাথোঁ এটা দিন বাকী থকাৰ মাজতে নির্বাচন বাতিলৰ দাবীত অব্যাহত আছে আমৰি কার্বিৰ ধাৰাবাহিক আন্দোলন৷ ১৪ ডিচেম্বৰৰ পৰা তিনিদিনীয়াকৈ অব্যাহত থকা অবিৰাম অৱস্থান ধর্মঘটৰ মাজতে আজি পুৱা ১১ বজাৰ পৰা শ শ আম্ৰি কার্বি লোকে ৩৭ নং ৰাষ্ট্রীয় পথত এক বিশাল মানৱ–শৃংখল কার্যসূচী ৰূপায়ণ কৰে৷ তেওঁলোকৰ দাবী– শৰীৰত শেষটোপা বিন্দু তেজ থকালৈকে এই সংগ্রাম কৰি যাব৷ তিনি শতাংশ তিৱা বসতিভূমি ডিমৰীয়াৰ ছয় সমষ্টিত তিৱা নির্বাচন পাতিব নোৱাৰিব বুলি দাবী কৰি অহাৰ পিছতো বলপূর্বকভাৱে ১৭ ডিচেম্বৰত এই নির্বাচন পাতিব বিচৰা কার্যক গৰিহণা দিছে আমৰি কার্বি সংগঠনে৷
খিলঞ্জীয়া ভূমি পুত্রসকলৰ কথাত কোনো গুৰুত্ব প্রদান নকৰাত ক্ষুব্ধ হৈছে জনগোষ্ঠীটোৰ ৰাইজ৷ ডিমৰীয়া সমষ্টি, ক্ষেত্রী সমষ্টি, সোণাপুৰ সমষ্টি, ডিগাৰু সমষ্টি, আম্প্রী সমষ্টি আৰু ফং আৰি সমষ্টিত কোনো আম্ৰি কার্বি ৰাইজে ভোটদান নকৰে বুলি স্পষ্ট কৰি দিছে৷ কেইজনমান দালালে এই নির্বাচন ডিমৰীয়াৰ ছয় সমষ্টিত পাতিব লাগে বুলি চৰকাৰক সহযোগ কৰা বুলি সংগঠনকেইটাই উল্লেখ কৰে৷ নির্বাচনৰ দিনাখন সমষ্টিকেইটাত এক অপ্রীতিকৰ পৰিস্থিতি সংঘটিত হোৱাৰো সম্ভাৱনা প্রকত হৈ পৰিছে৷ ইপিনে, কাইলৈও ২২ মাইলৰ চাকনীবাৰীত অবিৰাম ধর্মঘট কার্যসূচী ৰূপায়ণ কৰিব আম্ৰি কার্বি ৰাইজে৷