নিয়মীয়া বাৰ্তা ২১ ডিচেম্বৰঃ সংঘর্ষজর্জৰ আফগানিস্তানৰ ৰাজধানী কাবুলত এক গাড়ীবোমা বিস্ফোৰণত কমপক্ষেও ৮গৰাকী লোক নিহত হোৱাৰ উপৰি আন ১৫গৰাকী গুৰুতৰভাৱে আহত হৈছে৷ নিৰাপত্তা বাহিনীৰ এক সূত্রই সদৰী কৰা অনুসৰি ৰাজধানী চহৰখনৰ পশ্চিমপ্রান্তত সংঘটিত হৈছে এই বিস্ফোৰণ৷
স্মর্তব্য যে বিগত কেইটামান দিনৰ ভিতৰত আফগানিস্তানৰ ৰাজধানী চহৰখনত সন্ত্রাসবাদীৰ আক্রমণৰ ঘটনা অভাৱনীয়ভাৱে বৃদ্ধি পাইছে৷ স্বাস্থ্য মন্ত্রালয়ৰ সূত্রই সদৰী কৰা অনুসৰি আজি গাড়ীবোমা বিস্ফোৰণত আহত কেইবাজনৰো অৱস্থা সংকটজনক৷ গৃহ মন্ত্রালয়ৰ মুখপাত্র তাৰিক আৰিয়ানে নিহত লোকসকলৰ আটাইকেইগৰাকী অসামৰিক বুলি ঘোষণা কৰিছে৷