নিয়মীয়া বাৰ্তা, ২৬ ডিচেম্বৰঃ মহামাৰী ক’ৰোনা ভাইৰাছৰ সংক্রমণ ৰোধৰ বাবে চৰকাৰে ঘোষণা কৰা লকডাউনৰ সময়ৰে পৰা অসমৰ চিনেমা হলসমূহ বন্ধ হৈ থকাত ইয়াৰ স্বত্বাধিকাৰীসকল ভীষণ আর্থিক লোকচানৰ সন্মুখীন হৈছে৷ তাতোকৈ ভয়াৱহ আর্থিক সংকটৰ বলি হ’ব লগা হৈছে ছবিগৃহসমূহৰ কর্মচাৰীসকল৷ এনে পৰিস্থিতিত আর্থিকভাৱে জুৰুলা হৈ পৰা ছবিগৃহৰ সহস্রাধিক কর্মচাৰীক কিছু সকাহ দিয়াৰ বাবে এককালীন অর্থসাহায্য দিয়াৰ ব্যৱস্থা কৰিবলৈ ৰাজ্য চৰকাৰক আহ্বান জনাইছে সদৌ অসম ছবিগৃহৰ মালিক সন্থাই৷ আজি গুৱাহাটীত এখন সংবাদ মেলত সন্থাৰ সাধাৰণ সম্পাদক ৰাজীৱ কুমাৰ বৰাই কয়– ‘বর্তমান অসমীয়া ছবি উদ্যোগটোৰ অৱস্থা অত্যন্ত বেয়া৷ চিনেমা হলবোৰ এটা এটাকৈ বন্ধ কৰি দিব লগা হৈছে৷ গুৱাহাটীৰ তিনিটা ছবিগৃহ ইতিমধ্যে বন্ধ হৈ গৈছে৷
অনাগত দিনত আৰু কিমান ছবিগৃহ বন্ধ হয় তাৰ ঠিক নাই৷ ছবিগৃহসমূহ বন্ধ হৈ থকাত আমি মালিকসকলে ভীষণ লোকচান ভৰিব লগা হৈছে৷ তাতোকৈ আমাৰ ছবিগৃহৰ কর্মচাৰীসকলৰ অৱস্থা অতি শোচনীয় হৈ পৰিছে৷ এই কর্মচাৰীসকলক কিছু সকাহ দিবলৈ চৰকাৰে শীঘ্রে এক আর্থিক সাহায্য দিয়াৰ ব্যৱস্থা কৰিব লাগে৷ নহ’লে এই অসমীয়া কর্মচাৰীসকলৰ জীৱন অধিক দুর্বিষহ হৈ পৰিব৷ চৰকাৰে শীঘ্রে আর্থিক সাহায্য দিয়ক, যাতে আমি কর্মচাৰীসকলক সকাহ দিব পাৰোঁ৷ আমি যোৱা দহ মাহে কর্মচাৰীসকলক চলালোঁ৷ এতিয়া আমি নোৱাৰা হৈছোঁ৷ কাৰণ ছবিগৃহত চিনেমা নচলিলে আমি ক’ৰ পৰা দৰমহা দিম?’
সংবাদ মেলত ৰাজীৱ কুমাৰ বৰাই লগতে কয়– ‘আমাৰ দৃঢ় বিশ্বাস মুখ্যমন্ত্রীয়ে এইক্ষেত্রত কিবা এটা পদক্ষেপ ল’ব৷ কাৰণ ৰাজ্যৰ ১২টা ছবিগৃহৰ অৱস্থা অতি বেয়া৷ চৰকাৰে সাহায্য নিদিলে এই হলকেইটাও চিৰদিনৰ বাবে বন্ধ হৈ যাব৷ আমি এইক্ষেত্রত ৰাজ্যৰ বিত্তমন্ত্রী ড০ হিমন্ত বিশ্ব শর্মাৰো হস্তক্ষেপ কামনা কৰিছোঁ৷ আমি দুই এদিনৰ ভিতৰতে বিত্তমন্ত্রী ড০ শর্মাক সাক্ষাৎ কৰিম৷ আশা কৰিছোঁ এইক্ষেত্রত তেওঁ আমাক সহায় কৰিব৷’ সংবাদ মেলত সন্থাৰ সভাপতি চিন্ময় শর্মাই লকডাউনৰ সময়ছোৱাত বিদ্যুৎ বিভাগে ছবিগৃহৰ মালিকপক্ষক মাধমাৰ দিয়া বুলি অভিযোগ কৰে৷ সভাপতি শর্মাই কয়– যোৱা মার্চৰ পৰা ছবিগৃহসমূহ বন্ধ হৈ আছে৷ কিন্তু বন্ধ হৈ থকা সত্ত্বেও মালিকসকলে বিদ্যুৎ বিভাগক মাহে ৩০ৰ পৰা ৪০ হাজাৰ টকাপর্যন্ত ‘ফিক্সড চার্জ’ দি থাকিব লগা হৈছে৷ তাতোকৈ পৰিতাপৰ কথা এই যে ছবিগৃহসমূহত সংযোগ দিয়া বিদ্যুৎ ব্যৱহাৰ নকৰা বাবে বিদ্যুৎ বিভাগে অতিৰিক্তভাৱে জৰিমনা (পেনাল্টী) বিহিছে৷ আমি নিজে ছবিগৃহ বন্ধ কৰা নাই৷ চৰকাৰেহে বন্ধ কৰিছে৷ এনে পৰিস্থিতিত বিদ্যুৎ বিভাগে বিদ্যুৎ ব্যৱহাৰ নকৰাৰ বাবে জৰিমনা বিহাটো সম্পূর্ণ অন্যায় হৈছে৷
সংবাদ মেলত ৰাজীৱ কুমাৰ বৰাই কয়– ‘বিদ্যুৎ বিভাগে আচলতে ফিক্সড চার্জ ল’বই নোৱাৰে৷ কাৰণ ছবিগৃহ বন্ধ হৈ আছে৷ বিদ্যুৎ বিভাগে কি যুক্তিত ফিক্সড চার্জ ল’ব৷ বিদ্যুৎ ব্যৱহাৰ নকৰাক লৈ কি কাৰণে মালিকপক্ষক জৰিমনা ভৰাব? এইক্ষেত্রত এপিডিচিএলে একক আধিপত্য চলাইছে৷ ঝাৰখণ্ড, চেন্নাই, গোৱা আদিকে ধৰি ছখন ৰাজ্যত ইতিমধ্যে ছবিগৃহসমূহৰ ফিক্সড চার্জ লোৱা বন্ধ কৰিছে৷ লকডাউনৰ পৰিপ্রেক্ষিতত এই ছখন ৰাজ্যৰ চৰকাৰে যদি এনে পদক্ষেপ ল’ব পাৰে অসমে কিয় নোৱাৰে৷ গতিকে অসমতো ফিক্সড চার্জ লোৱাটো বন্ধ কৰিব লাগে৷ লগতে বিদ্যুৎ ব্যৱহাৰ নকৰাৰ বাবে মালিকসকলক জৰিমনা ভৰোৱাৰ পৰা বিৰত থাকিব লাগে৷ আমি এইক্ষেত্রত পদক্ষেপ গ্রহণ কৰিবলৈ চৰকাৰক দাবী জনালোঁ৷’