নিয়মীয়া বাৰ্তা, ৩০ ডিচেম্বৰঃ প্রাদেশিকীকৰণযোগ্য অনাশিক্ষক– কর্মচাৰীসকলৰ পদসমূহ ফিক্সড পে’ৰ পৰিৱর্তে সম্পূর্ণ দৰমহা প্রদান কৰাৰ ব্যৱস্থা নিশ্চিত কৰিবলৈ দাবী উত্থাপন কৰিছে সদৌ অসম প্রাদেশিকীকৰণযোগ্য অনাশিক্ষক–কর্মচাৰী সন্থাই৷ এক বিবৃতিত সন্থাৰ সাধাৰণ সম্পাদক যুগল কুমাৰ শর্মাই কয় যে অনাশিক্ষক–কর্মচাৰী পদ প্রাদেশিকীকৰণৰ ব্যৱস্থা গ্রহণ নকৰাত অনাশিক্ষক–কর্মচাৰী ভৱিষ্যৎ অন্ধকাৰৰ দিশে গতি কৰিছে৷ কালি বিধানসভা অধিৱেশনত এই সন্দর্ভত সংশ্লিষ্ট আইনৰ সংশোধনী প্রস্তাৱ উত্থাপন কৰা হৈছে যদিও ছিনিয়ৰ কলেজৰ লাইব্রেৰিয়ান পদটো অনাশিক্ষক পদ হিচাপে প্রাদেশিকীকৰণৰ কথা উল্লেখ কৰা হৈছে৷
কিন্তু তেওঁলোকৰ দৰমহাৰ গাঁথনিৰ কথা উল্লেখ কৰা হোৱা নাই৷ এই পদটো ইউজিচি অর্হতা সম্পর্কীয় নিয়ম অনুসৰি পূর্ণ পর্যায়ৰ চৰকাৰী কর্মচাৰী কৰিব৷ ইয়াৰ বিপৰীতে মাধ্যমিক, উচ্চতৰ, উচ্চ আৰু উচ্চ প্রাথমিক বিদ্যালয়ৰ অনাশিক্ষক– কর্মচাৰীসকলক ফিক্সড পে’ৰ দিয়াৰ পদক্ষেপ গ্রহণ কৰিব বুলি জানিব পৰা গৈছে৷ সেয়েহে এওঁলোককো ফিক্সড পে’ৰ পৰিৱর্তে সম্পূর্ণ দৰমহা আদায় দিয়াৰ দাবী উত্থাপন কৰিছে সন্থাই৷