নিয়মীয়া বাৰ্তা, ২৩ জানুৱাৰীঃ কেন্দ্রীয় অনুসন্ধান সংস্থা (চিবিআই)ই আজি ব্রিটিছ ৰাজনৈতিক পৰামর্শদাতা প্রতিষ্ঠান কেম্ব্রিজ এনালিটিকা আৰু গ্ল’বেল ছায়েন্স ৰিছার্চ লিমিটেডৰ বিৰুদ্ধে এক গোচৰ ৰুজু কৰিছে৷ ফেচবুকৰ পৰা ভাৰতীয় লোকৰ ব্যক্তিগত ডাটা সংগ্রহ কৰাৰ বাবেই এই সংস্থা দুটাৰ বিৰুদ্ধে সংস্থাটোৱে গোচৰ ৰুজু কৰা বুলি ঘোষণা কৰিছে৷ সুদীর্ঘ আঢ়ৈ বছৰ ধৰি চলোৱা তদন্তৰ পিছত ৩৫০গৰাকী ফেচবুক ব্যৱহাৰকাৰীৰ লগতে তেওঁলোকৰ ফ্রেণ্ড নেটৱর্কত থকা ৫ লাখ ৬২ হাজাৰগৰাকী লোকৰ তথ্য সংগ্রহ কৰা বুলি নিশ্চিত কৰিছে৷ অবৈধভাৱে এই তথ্য সংগ্রহ কৰা বুলি অভিযোগ কৰিছে চি বি আয়ে৷
সংস্থাটোৱে গ্ল’বেল ছায়েন্স ৰিছার্চ লিমিটেডৰ সঞ্চালক ড০ আলেকজেণ্ডাৰ ক’গানৰ বিৰুদ্ধে গোচৰ ৰুজু কৰাৰ উপৰি কেম্ব্রিজ এনালিটিকাৰ বিৰুদ্ধেও তথ্য–প্রযুক্তি আইনৰ অধীনত ৰুজু কৰিছে এটি গোচৰ৷ স্মর্তব্য যে পূর্বেও কেম্ব্রিজ এনালিটিকা অনুৰূপ অভিযোগৰ সন্মুখীন হৈছিল৷