নিয়মীয়া বাৰ্তা, ২১ ডিচেম্বৰঃ মহানগৰীৰ পানীখাইতী আৰক্ষী চকীৰ অন্তর্গত বোন্দাৰ আমগাঁৱত শুকুৰবাৰে এক ভয়ংকৰ অগ্নিকাণ্ড সংঘটিত হয় ৷ জানিব পৰা মতে, আমগাঁও নিৱাসী বিমলা সিন্হাৰ ভাৰাঘৰত শ্বর্ট চার্কিটৰ ফলত এই অগ্নিকাণ্ড সংঘটিত হয় ৷ জুইৰ লেলিহান শিখাই ভয়াৱহ ৰূপ ধাৰণ কৰি এটাৰ পিছত আনটো ভাৰাঘৰলৈ জুই বিয়পি পৰে ৷ দিনৰ ১.৩০ বজাত সংঘটিত হোৱা অগ্নিকাণ্ডই ইমানেই ভয়াৱহ ৰূপ ধাৰণ কৰে যে নিমিষতে ৮টাকৈ ভাৰাঘৰ ভস্মীভূত হয় ৷ অগ্নিকাণ্ডটোত ৪–৫ লক্ষাধিক টকাৰ সা–সামগ্রী জুইত জাহ যায় ৷ পানীখাইতী আৰক্ষী চকী আৰু চন্দ্রপুৰৰ অগ্নিনির্বাপক বাহিনীৰ দুখনকৈ জুই নুমুওৱা বাহন ঘটনাস্থলীত উপস্থিত হৈ জুই নির্বাপণ কৰিবলৈ সক্ষম হয় ৷ আৰক্ষীয়ে জনোৱা মতে, অগ্নিকাণ্ডটোত ধনেশ্বৰ দাস, অক্ষয় কলিতা, শম্ভু ৰাজবংশী, ৰীণা দাস, দেৱেন লহকৰ, বাপী মণ্ডল আৰু কল্পনা দাসৰ বাসগৃহ জ্বলি ছাই হয় ৷