নিয়মীয়া বাৰ্তা ২৮ জানুৱাৰীঃ টীম ইণ্ডিয়াৰ বিপক্ষে চাৰিখনীয়া টেষ্ট শৃংখলাত অংশ লোৱাৰ উদ্দেশ্যে জ’ ৰুট নেতৃত্বাধীন ইংলেণ্ড ক্রিকেট দলটোৱে আজি চেন্নাইত উপস্থিত হৈছে৷ ৰুট বাহিনীয়ে শ্রীলংকাৰ পৰা পোনে পোনে আজি ভাৰতত উপস্থিত হয়৷ চেন্নাইত উপস্থিত হৈয়েই দলটোৰ সদস্যসকলৰ লগতে ছাপ’ট ষ্টাফে পোনে পোনে হোটেললৈ যায় আৰু তেওঁলোকে অহা ছদিন কোৱাৰেণ্টাইনত থাকিব৷ মন কৰিবলগীয়া যে দলটোৰ তাৰকা অলৰাউণ্ডাৰ বেন ষ্ট’কছৰ লগতে তাৰকা পেচ বলাৰ জ’ফ্রা আর্চাৰ আৰু ৰ’ৰি বার্নছে দেওবাৰে নিশা চেন্নাইত উপস্থিত হৈছিল৷ ইংৰাজ বাহিনীয়ে ২ ফেব্রুৱাৰীত অনুশীলনত নামিব৷ দুয়ো দেশৰ মাজৰ প্রথম দুখন টেষ্ট চেন্নাইত খেলোৱা হ’ব আৰু প্রথমখন টেষ্ট ৫ ফেব্রুৱাৰীৰ পৰা আৰম্ভ হ’ব৷ ইফালে, ভাৰতীয় দলটোৰ তাৰকা বেটছমেন ৰোহিত শর্মা, সহঃ অধিনায়ক আজিংক্য ৰাহানেৰ লগতে কেইগৰাকীমান খেলুৱৈ মঙলবাৰে নিশা চেন্নাইত উপস্থিত হৈছে৷ ইপিনে, শ্বেটেশ্বৰ পূজাৰা, বুমৰাহ আৰু ঋষভ পণ্টে আজি পুৱা চেন্নাইত উপস্থিত হয়৷