নিয়মীয়া বাৰ্তা, ৩০ জানুৱাৰীঃ বি ডব্লিউ এফ বিশ্ব ট্যুৰ ফাইনেলছত সাত্ব্ন্নাসূচক জয়লাভ কৰিছে ভাৰতৰ তাৰকা মহিলা শ্বাটলাৰ পি ভি সিন্ধুৱে৷ মহিলাৰ ছিংগলছৰ গ্রুপ ‘বি’ৰ প্রথম দুখন মেচত পৰাস্ত হৈ প্রতিযোগিতাখনৰ পৰা বাহিৰ হোৱা সিন্ধুৱে অন্তিমখন লীগ মেচত থাইলেণ্ডৰ প্রণপাৱে ছ’চুৱঙক পোনপটীয়াকৈ ২১–১৮, ২১–১৫ গেমত পৰাস্ত কৰে৷
ইফালে, ভাৰতৰ আগশাৰীৰ পুৰুষ শ্বাটলাৰ কিদাম্বি শ্রীকান্তে জয়ৰ মুখ নেদেখাকৈ প্রতিযোগিতাখনত অভিযান সামৰে৷ পুৰুষ ছিংগলছৰ গ্রুপ ‘বি’ৰ অন্তিমখন মেচত শ্রীকান্তে হংকঙৰ লং আনগুচৰ হাতত কঠিন সংগ্রামৰ মূৰত ২১–১২, ১৮–২১, ১৯–২১ গেমত পৰাজয় স্বীকাৰ কৰে৷ মন কৰিবলগীয়া যে শ্রীকান্তে প্রথম দুয়োখন লীগ মেচতো পৰাজয়ৰ সন্মুখীন হৈছিল৷