জালুকবাৰী বিজেপিৰ প্রার্থী ড০ হিমন্ত বিশ্ব শর্মা, বিৰোধীৰ কোন?

নিয়মীয়া বাৰ্তা ১১ মাৰ্চঃ অসমৰ ভিতৰতে অনন্য হিচাপে বিবেচিত জালুকবাৰী সমষ্টিত শাসকীয় দলৰ বাহিৰে আজিলৈকে কোনো এটা দলেই প্রার্থীৰ নাম ঘোষণা কৰা নাই৷ আনকি সমষ্টিটোত বিৰোধী শিবিৰৰ পৰা কোন প্রার্থীক অৱতীর্ণ কৰাব তাৰো নাম–গোন্ধ নাই৷ কিছুদিন পূর্বে এজেপিৰ সভাপতি লুৰিণজ্যোতি গগৈয়ে জালুকবাৰীত ড০ হিমন্ত বিশ্ব শর্মাৰ বিৰুদ্ধে এগৰাকী সিংহ পুৰুষ থিয় কৰাব বুলি শুৱালকুছিত ৰাজহুৱাভাৱে ঘোষণা কৰিছিল৷ কিন্তু জালুকবাৰীৰ ৰাইজে আজিলৈকে সিংহ পুৰুষগৰাকীৰ নামকে জানিবলৈ সক্ষম হোৱা নাই৷ ৰাইজে এজেপিৰ সিংহ পুৰুষগৰাকীৰ নাম শুনিবলৈ অধীৰ আগ্রহেৰে ৰৈ আছে৷ আনহাতে, অন্যান্য দলসমূহৰো সমষ্টিটোত  সাংগঠনিক দিশ একেবাৰে দুর্বল৷ যাৰ বাবে হিমন্তৰ বিৰুদ্ধে প্রার্থী থিয় কৰোৱাটো এক দুৰূহ কার্য হৈ পৰাৰ দৰে হৈছে৷ উল্লেখ্য যে বিগত বিশটা বছৰে ড০ হিমন্ত বিশ্ব শর্মাৰ দখলত থকা জালুকবাৰী সমষ্টিত তেওঁৰ বিপৰীতে কোনো এজন প্রার্থীয়ে আগবাঢ়ি নহাটো আশ্চর্যজনক হিচাপে বিবেচিত হৈছে৷