নিয়মীয়া বাৰ্তা ১৩ মাৰ্চঃ টেষ্ট শৃংখলাত দুর্দান্ত জয় সাব্যস্ত কৰা টীম ইণ্ডিয়াই টি–২০ শৃংখলাৰ প্রথমখন মেচত শোচনীয় পৰাজয়ৰ সন্মুখীন হৈছে৷ আহমেদাবাদৰ নৰেন্দ্র মোদী ক্রিকেট ষ্টেডিয়ামত কালি অনুষ্ঠিত প্রথম টি–২০ত ইংলেণ্ডে ভাৰতক আঠ উইকেটত পৰাস্ত কৰিবলৈ সক্ষম হয়৷ মাত্র ১২৫ ৰানৰ লক্ষ্যৰ পিছ লৈ ইংলেণ্ডে ২৭টা বল বাকী থকা অৱস্থাত দুটা উইকেট হেৰুৱাই জয় সাব্যস্ত কৰে৷ অ’পেনাৰ জেছন ৰয়ে সর্বাধিক ৪৯ ৰানৰ অৰিহণা আগবঢ়ায়৷ তেওঁ ৩২ বলৰ সন্মুখীন হৈ চাৰিটা বাউণ্ডেৰী আৰু তিনিটা অভাৰ বাউণ্ডেৰী কোবায়৷ জ’ছ বাটলাৰে ২৪টা বলত দুটা বাউণ্ডেৰী আৰু এটা অভাৰ বাউণ্ডেৰীৰে ২৮ ৰান কৰি আউট হয়৷ ডেৱিদ মালানে ২০ বলত দুটা বাউণ্ডেৰী এটা অভাৰ বাউণ্ডেৰীৰে ২৪ ৰানত অপৰাজিত হৈ ৰয়৷ একেদৰে জ’নী বিয়েৰষ্ট’ই ১৭টা বল খেলি এটা বাউণ্ডেৰী আৰু দুটা ছিক্সাৰ কোবাই ২৬ ৰান সংগ্রহ কৰে৷ এই জয়েৰে ইংলেণ্ডে পাঁচখন মেচৰ শৃংখলাটোত ১–০ৰ অগ্রগতি অর্জন কৰিবলৈ সক্ষম হয়৷
ইয়াৰ পূর্বে ইংলেণ্ডৰ আমন্ত্রণক্রমে ইনিংছ মুকলি কৰি ভাৰতে আৰম্ভণিৰে পৰা বিপর্যয়ৰ সন্মুখীন হয়৷ দলটোৱে মাত্র ২০ ৰানৰ ভিতৰতে অ’পেনাৰ লোকেশ ৰাহুল, শিখৰ ধাৱন আৰু অধিনায়ক বিৰাট কোহলিৰ উইকেট হেৰুৱায়৷ ৰাহুলে ১, কোহলিয়ে ০, ধাৱনে ৪ ৰানত আউট হোৱাত ভাৰত চৰম বিপর্যয়ৰ সন্মুখীন হয়৷ ইয়াৰ পিছত ঋষভ পণ্ট আৰু শ্রেয়াছ আয়াৰে ভাৰতীয় ইনিংছ গঢ়াৰ দায়িত্ব লয়৷ তাৰকা মিডল অর্ডাৰ বেটছমেন আয়াৰে দর্শনীয় বেটিঙেৰে ঘৰুৱা দলটোৰ ইনিংছ আগুৱাই নিয়ে যদিও পণ্ট ব্যক্তিগত ২১ ৰানত পেভিলিয়নমুখী হয়৷ তেওঁ ২৩টা বলত দুটা বাউণ্ডেৰী আৰু এটা অভাৰ বাউণ্ডেৰী কোবায়৷ কিছু সময় পিছত হার্দিক পাণ্ডিয়াকো পেভিলিয়নৰ বাট দেখুৱায় ইংলেণ্ডৰ তাৰকা বেগী বলাৰ জ’ফ্রা আর্চাৰে৷ পাণ্ডিয়াই ২১ বলত এটা বাউণ্ডেৰী আৰু এটা ছিক্সাৰৰ সহায়ত ১৯ ৰান কৰে৷ আয়াৰে মাত্র ৪৮ বলৰ সন্মুখীন হৈ আঠটা বাউণ্ডেৰী আৰু এটা অভাৰ বাউণ্ডেৰীৰ সহায়ত ৬৭ ৰানৰ দায়িত্বপূর্ণ ইনিংছ খেলে৷ ছার্দুল ঠাকুৰ প্রথমটো বলতে আউট হয়৷ ৱাশ্বিংটন সুন্দৰে ৩ আৰু অক্ষৰ পেটেল সাত ৰানত অপৰাজিত হৈ ৰয়৷ ভাৰতৰ এই বিপর্যয়ৰ মূলতেই আছিল ইংলেণ্ডৰ নিয়ন্ত্রিত বলিং৷ জ’ফ্রা আর্চাৰে মাত্র ২৩ ৰান ব্যয় কৰি তিনিটা উইকেট দখল কৰিবলৈ সক্ষম হয়৷ উল্লেখ্য যে প্রথম আৰু দ্বিতীয় টি–২০ৰ পৰা ৰোহিত শর্মাক বিশ্রাম দিয়া বুলি কোহলিয়ে আজি প্রকাশ কৰে৷