নিয়মীয়া বাৰ্তা, ১৮ মার্চঃ গৃহযুদ্ধবিধ্বস্ত য়েমেনৰ ৰাজধানী ছানাত এক প্রব্রজনকাৰীৰ বন্দী কেন্দ্রত সংঘটিত ভয়াৱহ অগ্ণিকাণ্ডত ৪৬জন লোক নিহত হোৱাৰ উপৰি ১৯৩জন গুৰুতৰভাৱে আহত হৈছিল৷
এই ঘটনা সন্দর্ভত শেহতীয়াকৈ হুঠি বিদ্রোহীয়ে গভীৰ দুখ প্রকাশ কৰিছে৷ যদিও এই অগ্ণিকাণ্ডক এক দুর্ঘটনা বুলি অভিহিত কৰা হৈছিল, ইয়াত হুঠি বিদ্রোহীৰ বোমা নাইবা ছৌদি মিত্র বাহিনীৰ ক্ষেপণাস্ত্রৰ আক্রমণ সংঘটিত হোৱা বুলি ধাৰণা কৰিছিল আন্তর্জাতিক সম্প্রদায়সমূহে৷
কালি ৰাষ্ট্রসংঘই এই অগ্ণিকাণ্ডৰ ঘটনা সন্দর্ভত এক নিৰপেক্ষ তদন্তৰ দাবী জনাইছে৷ হিউমেন ৰাইটছ ৱাটছে হুঠি বিদ্রোহী বন্দী কেন্দ্রত অগ্ণিসংযোগ কৰা বুলিও অভিযোগ কৰিছে৷
লক্ষণীয়ভাৱে এই অগ্ণিকাণ্ডৰ পিছতে বহু প্রব্রজনকাৰীয়ে বিক্ষোভত উত্তাল কৰি তুলিছে য়েমেনৰ ৰাজধানী ছানা৷ প্রত্যক্ষদর্শীয়ে উল্লেখ কৰা অনুসৰি এই প্রতিবাদকাৰীসকলৰ ভিতৰত আছে ইথি’পিয়াৰ শ শ প্রব্রজনকাৰী৷
স্মর্তব্য যে ইথি’পিয়াৰ পৰা অহা কেইবাহাজাৰো প্রব্রজনকাৰীক ৰাজধানী ছানাত বন্দী কৰি ৰখা হৈছে৷ এই বন্দীসকলৰ ওপৰত সঘনে চলাই থকা হৈছে নাৰকীয় নির্যাতন৷ হুঠি বিদ্রোহীয়ে বিভিন্ন সময়ত প্রব্রজনকাৰী ইথি’পিয়ান লোকসকলৰ ওপৰত আতিশয্য চলোৱাৰ বাবেই অলপতে সংঘটিত অগ্ণিকাণ্ডত বিদ্রোহী সংগঠনটো জড়িত থকা বুলি সন্দেহ কৰা হৈছে৷