নিয়মীয়া বাৰ্তা, ১৮ মার্চঃ বিগত ছটা মাহৰ ভিতৰত বিশ্বত জলবায়ু পৰিৱর্তনৰ ফলত সৃষ্টি হোৱা প্রাকৃতিক পৰিঘটনাত ১০.৩ নিযুত লোক গৃহহীন হৈছে৷ দেশৰ অভ্যন্তৰতে এই লোকসকল স্থানচ্যুত হৈছে বুলি ইণ্টাৰনেচনেল ফেডাৰেচন অৱ ৰেডক্রছ আৰু ৰেড ক্রেছকেন ছ’চাইটিজৰ প্রতিবেদনত প্রকাশ পাইছে৷
লক্ষণীয়ভাৱে এই সময়ছোৱাত সংঘর্ষৰ ফলত স্থানচ্যুত হৈছে ২.৩ নিযুত লোক৷ জলবায়ু পৰিৱর্তনৰ ফলত স্থানচ্যুত হোৱা ৬০ শতাংশ লোকেই হৈছে এছিয়াৰ৷ ২০২০ৰ ছেপ্টেম্বৰৰ পৰা ২০২১ৰ ফেব্রুৱাৰীলৈকে দুয়োটা আন্তর্জাতিক সংস্থাই এই তথ্য সদৰী কৰিছে যদিও জলবায়ু পৰিৱর্তনৰ ফলত শেহতীয়াকৈ বিশ্বজুৰি গৃহহীন লোকৰ সংখ্যা দ্রুতগতিত বৃদ্ধি পাবলৈ ধৰিছে৷
এই কথা সদৰী কৰিছে ৰেডক্রছৰ এছিয়া প্রশান্ত মহাসাগৰীয় অঞ্চলৰ প্রব্রজন তথা স্থানচ্যুত লোকৰ বিভাগৰ সমন্বয়ৰক্ষী হেলেন ব্রাণ্টে৷ ব্রাণ্টৰ মতে পৰিস্থিতি ক্রমাৎ অধিক জটিল হৈ পৰিছে৷